Soltüstık Казахстан
Булаев қаласындағы “Достық” мәдениет және демалыс саябағының меңгерушісі Мейрам Рыспаев ұлттық мұрамызды сақтап, мәдени құндылықтардың дамуына үлес қосып жүр. Ол ауданның қоғамдық-саяси өміріне белсенді қатысып, он жыл бойы “Мақсат” қазақ этномәдени бірлестігіне жетекшілік етуде. Қоғамдық жұмыстармен өнерді де қатар ұстауда. Он саусағынан өнер тамған азамат – үздік қолөнер шебері.
“Жігітке жеті өнер де аз” деген дана халқымыздың нақыл сөзі Мейрам Қағошұлына қаратып айтылғандай. Оның былғарыдан, жүннен, матадан, ағаштан жасаған бұйымдары әркез аудандық және облыстық деңгейде өтетін іс-шаралардың төрінен орын алады.
Мәселен, Мейрам Рыспаев 2017 жылы облыстың қолөнершілер делегациясының құрамында Астана қаласындағы ЭКСПО-2017 көрмесіне қатысқанын айтып өткен жөн. Оның тамаша туындыларын барша ел тамашалағанын мақтаныш етеміз. Өткен жылы ұлы ақын Мағжан Жұмабаевтың 130 жылдығына орай оның қолөнер бұйымдары Петропавл қаласында өткен “Салт-дәстүр” этномәдени бірлестіктерінің облыстық байқауында көпшілік назарына ұсынылып, бас жүлдені жеңіп алды.
Мейрам Қағошұлы өзінің туындыларымен Наурыз мейрамы, Қазақстан халқының бірлігі күні, Рухани келісім күні сынды басқа да мерекелерде ұлттық қолөнерді, салт-дәстүрді насихаттап, оның дамуына өзіндік үлесін қосып келеді. Ата-бабамыздан өнеге болған қолөнерді өскелең ұрпаққа үйретуді басты мақсат еткен азамат ұлт тәрбиесіне үлкен назар аудару қажет екенін айтудан жалыққан емес.
“Жақсының жақсылығын айт, нұры тасысын!” дегендей үстіміздегі жылы өңір халқы су тасқынынан біраз жапа шекті. Өзге де жанашыр, қайырымды азаматтармен бірге Мейрам Қоғашұлы да қиын жағдайға тап болған тұрғындарға көмек қолын созып, су тасқынынан зардап шеккен жандарға гуманитарлық көмек ұйымдастырды. Ізгі шараның басы-қасында болған жерлесіміздің азаматтығын танытатын мұндай қасиеттері аз емес.
Бүгінде Пайғамбар жасына жетіп, құрметті демалысқа шығып жатқан Мейрам Қағошұлын барша аудан жұртшылығы мақтаныш етеді. Өнегелі өмірімен, еткен еңбегімен көпшіліктің құрметіне бөленген азаматқа мықты денсаулық тілейміз.
Айгүл ӘБСАЛЫҚОВА,
аудандық ішкі саясат, мәдениет және тілдерді дамыту бөлімінің бас маманы.
Мағжан Жұмабаев ауданы.