Soltüstık Казахстан
Петропавлдың жолдарын жөндеуде ANT технологиясы қолданылуда. Аталған технология бойынша жолдарды салу және қолданыстағыларды қайта қалпына келтіру жұмысын “ANT-ROADS” жауапкершілігі шектеулі серіктестігі орындап жатыр.
Мамандардың айтуынша, ANT әдісі шетелдерде танымал болғанымен, біздің өңірде алғаш рет қолданылып отыр. Бұл жаңа технология жұмыс үдерісін айтарлықтай жеңілдетуге және жылдамдатуға, шығындар мен уақытты үнемдеуге мүмкіндік береді.
Жаңа технологиямен әзірленген жол жабыны әзірге Жұмысшы кентіндегі Ломоносов көшесіне төселген. Сапасы көңілден шықса, дәл осы әдіспен Петропавлдың басқа да көшелерін қайта қалпына келтіру көзделген.
– Биыл біз “СК Гарант” асфальт-бетон зауытымен асфальт қоспасын әзірлеуге келісім жасадық. Қазіргі таңда бұл зауыт Петропавл қаласының жолдарын асфальтпен қамтамасыз етуде. Жаңа технология оң нәтижеге қол жеткізген жағдайда “СК Гарант” бұл тәсілді тек қалада ғана емес, облыстық және жергілікті жолдарды жөндеуде де қолданатын болады. Аталмыш зауыт сағатына 90 тоннаға дейін асфальт қоспасын шығара алады, – дейді “ANT – ROADS” ЖШС-ның директоры Нұрлан Құрманбеков.
ANT технологиясын жолдардың барлық санаттарына, кез келген климаттық аймақтарда қолдануға болады. Жоғары сапалы асфальт жасау үшін алдымен жолдың ескі жабынын алып тастап, оны модификаторға 12 сағатқа қайта өңдеуге қояды. Кейін оған қиыршық тас пен битум салынады. Сондай-ақ асфальт сапасы жоғары болуы үшін фиброталшықтар қосылады.
“СК ГАРАНТ ГРУПП” ЖШС-ның операторы Василий Григоренконың сөзінше, ANT технологиясы Польша мен Үндістанда кеңінен танымал. Үдеріс толығымен автоматтандырылған. Тас материалды кептіргіш барабанға салып, оны 160-180 градус температураға дейін қыздырады. Кейін фракцияларға бөледі. Содан соң битум қосып, нәтижесінде дайын өнім пайда болады.
Гүлфайруз ТӨРЕМҰРАТОВА,
“Soltüstık Qazaqstan”.