Soltüstık Казахстан
Қаламызда республикалық “Мектепке жол” акциясы жалғасуда. Бұл жолы қайырымдылық шарасы М.Қозыбаев атындағы Солтүстік Қазақстан университетінің қабырғасында өтті. Аталған жоғары оқу орны екі отбасына материалдық көмек көрсетіп, ал 9 отбасынан шыққан 21 балаға кеңсе тауарлары салынған рюкзактар мен спорт дүкеніне сертификаттар табыстаған.
“Акция аясында біз қызметкерлеріміздің отбасыларына көмектесуге және қолдау көрсетуге шешім қабылдадық. Жұмысыңыз үшін рақмет. Әр балаға спорттық киім немесе аяқ киім сатып алуға сертификаттар беріледі. Оқушылар жаңа оқу жылында үздік нәтижелер көрсетіп, ата-аналарын қуанта берсін!”, – деді университеттің басқарма мүшесі Азамат Жикеев.
Бұл акцияға қатысу үшін мұқтаж ата-аналар өз білім беру ұйымдарындағы әлеуметтік педагогтарға жүгінуге тиіс, ал олар өз кезегінде тізімдерді дайындап, тиісті мекемелерге жібереді.
Қайырымдылық акциясына қатысқандардың бірі – Баталовтар отбасы. Виталий мен Светлана көптеген жылдар бойы жергілікті университетте жұмыс істеп келеді. Бүгінде бес бала тәрбиелеп отырған отбасына көмек артық етпейді.
“Басшылыққа үлкен алғыс айтамыз, әрдайым қол ұштарын созып, көмек көрсетуге дайын тұрады. Енді міне, мектепке толығымен рюкзак жинап берді. Бұл – біз үшін үлкен қолдау”, – деді Светлана Баталова.
Жалпы “Мектепке жол” акциясы аз қамтылған және көп балалы отбасылардан шыққан оқушыларды, жетім қалған балаларды материалдық қолдауға бағытталған.
Ләзиза МЫРЗАНТАЙҚЫЗЫ,
“Soltüstık Qazaqstan”.