Soltüstık Казахстан
Биыл 1 наурызда алғаш рет елдің барлық аймағында өңірлік кадрлық резервке іріктеу басталған болатын. Қазіргі таңда іріктеудің соңғы кезеңі өтіп жатыр. Мақсат – жас басқарушылардың аймақтық пулын қалыптастыру және дарынды жастарды өңірлерді дамытуға тарту. Өңірлік іріктеуге 35 жастан аспаған, жоғары білімі және кемінде 3 жыл жұмыс өтілі бар азаматтар қатысты.
Өңірлік кадрлық резервке іріктеу бірнеше кезеңнен тұрады – құжаттарды қабылдау, заңнама мен жеке қасиеттерді бағалауға арналған тестілеу, құзыреттерді бағалау, құрылымдық сұхбат және өңірлік кадр комиссиясының отырысы. Қазір Солтүстік Қазақстан облысының өңірлік кадр резервіне іріктеудің қорытынды кезеңі – үміткерлермен құрылымдық сұхбат өткізілуде.
Сұхбатқа бес салалық бағыт – агроөнеркәсіптік кешен және жер қатынастары, тұрғын үй-коммуналдық шаруашылығы және инфрақұрылым, индустрия және өнеркәсіп, экономика және қаржы, сондай-ақ әлеуметтік салалар бойынша барлығы 34 үміткер қатысуда.
Іріктеуді облыстың кадр комиссиясы жүргізеді. Қатысушылар таңдаған салалық бағыттары бойынша іске асыру кезеңдері, пайда болатын проблемалар және күтілетін нәтижелер көрсетілген жобаларды ұсынады. Комиссия жобаларды берілген критерийлер бойынша бағалайды.
Сұхбат кезеңінде іріктеудің ашықтығы үшін қоғамдық бірлестіктер мен БАҚ өкілдері, сондай-ақ салалық сарапшылар қатысады.
Барлық кезеңдердің нәтижелері бойынша облыстың өңірлік кадр резервіне 20 кандидат қабылданады. Өңірлік резервте болу мерзімі – 2 жыл. Олар жергілікті атқарушы органдарда “Б” корпусының мемлекеттік әкімшілік лауазымына конкурстық іріктеусіз орналаса алады.
Ақмарап ҚҰРМАНАЙҚЫЗЫ,
“Soltüstık Qazaqstan”.