Soltüstık Казахстан
Өңірде жыл басынан бері көкжөтелдің 62 жағдайы тіркелді. Ауырғандардың 94 пайызы – 14 жасқа дейінгі балалар. Облыстық санитарлық-эпидемиологиялық бақылау департаменті инфекциялық және паразиттік ауруларды эпидемиологиялық қадағалау бөлімінің бас маманы Гүлида Жакеева бактериялық инфекцияны жұқтырудың адам өміріне қалай қауіп төндіретіні жайында айтып берді.
Биыл өңірде көкжөтелді жұқтыру еселеп артқан. Маманның айтуынша, облыста 2021 жылы ауру тіркелмесе, 2022 жылы бір бала ауырған, былтыр бұл диагноз 20 адамға қойылыпты.
“Биыл қаңтарда 8 адам, ақпан-наурызда 5 адам ауырса, сәуірде жұқтырғандар саны күрт артып, 16 адам ем алған. Мамырда көкжөтелмен ауырудың – 13, маусымда 6, шілдеде 10 жағдайы тіркелді. Ауырған 62 адамның 58-і – 14 жасқа дейінгі бала. Сырқаттанғандардың ішінде Петропавл тұрғындарының үлесі басым, облыс орталығында 49 адам ауырды, Қызылжар ауданында – 6, Айыртауда – 2 және қалған аудандарда бір-бірден тіркелді. Сырқаттанғандардың 96 пайызы вакцина алмаған”, – дейді Гүлида Жакеева.
Маманның айтуынша, бактериялық инфекцияның таралуының басты себебі де осы, соңғы жылдары вакцина қойдырудан бас тартқандар көбейген. Дәрігерлер көкжөтелді вакцина арқылы бақыланатын дертке жатқызады. Ол негізінен төрт жастан асқан балаларға тез жұғады. Ауруға қарсы иммунитет ана сүтімен берілмейді, сондықтан балалық шақта ауруды жұқтыру ықтималдығы жоғары екен.
“Көкжөтел – ауыз қуысында, мұрында және көмейде болатын bordetella pertussis бактериясын тудыратын тыныс алу жолдарының өте жұқпалы ауруы. Ересек адамда немесе балада спастикалық жөтел ұстамалары пайда болады, бұл ауыр анатомиялық, физикалық зақымдануларға, өкпенің обструктивті аурулары мен пневмонияның одан әрі дамуына әкелуі мүмкін. Көп жағдайда көкжөтел қарапайым респираторлық вирустық инфекция сияқты басталады, орташа құрғақ жөтел және мұрыннан су ағу пайда болады, дене температурасы 37-38 градусқа дейін көтерілуі мүмкін”, – дейді маман.
Гүлида Жакеева балаларды және барлық ересектерді көкжөтелден қорғаудың жалғыз сенімді және тиімді әдісі екпе екенін айтты. Алғашқы вакциналау шарасы сәбидің 2, 3, 4 және 18 айларында басталады, содан кейін 6 жаста жүргізіледі. Егер осы жағдайлар сақталса, ағзада көкжөтел ауруына жеткілікті күшті иммунитет пайда болады.
Ақерке ДӘУРЕНБЕКҚЫЗЫ,
“Soltüstık Qazaqstan”.