Soltüstık Казахстан
Азаматтардың конституциялық құқықтарына кепілдік беру барлық мемлекеттік институттардың басты мақсаты саналады. Сонымен қатар әркім Конституцияны және заңдарды сақтауға, басқа адамдардың құқықтарын, бостандықтарын, абыройы мен қадір-қасиетін құрметтеуге міндетті. Қазақстан Республикасын қорғау – оның әрбір азаматының қасиетті парызы екенін жадымыздан шығармауымыз керек. Полиция қызметі қазақстандықтардың өмірі мен мүлкіне қол сұғушылықтың алдын алудан бастап, қоғамның қауіпсіздігін толық қамтамасыз етуге әркез тастүйін дайын. Қылмыстардың жолын кесу, ашу, алдын алу, қоғамдық орындарда құқықтық тәртіпті бақылау, ішкі демографияны реттеуге атсалысу, тағы басқа мәселелер басты назарымызда. Осыған орай құқықтық тәртіп сақшылары өз функцияларын жергілікті атқарушы органдармен тығыз байланыста орындауды басты бағдар етеді. Демократиялық институттарды нығайту, оларды қоғаммен жақындастыру, халықпен сенімгерлік қарым-қатынас орнату, қызметтердің ашықтығы мен қолжетімділігін нығайту жолындағы қадамдар да біз үшін өте маңызды.
Президент халыққа арнаған Жолдауларында қазіргі қазақстандық полицияға қойылатын негізгі талаптарды нақты айқындап берді. “Халық үніне құлақ асатын мемлекет” тұжырымдамасы аясында билік пен қоғам арасындағы байланыс механизмдері жетілдірілді. Жаңашылдыққа бағытталған “үш буынды модель” қылмыстық процестегі азаматтардың құқықтарын қорғаудың кепілі ретінде орнықты. Оның басты мәні – тергеу орындары, прокуратура және сот арасындағы өкілеттіктердің ара-жігін нақты ажыратып беруінде. Енді тергеу орындары қылмысты ашып, дәлелдемелер жинаса, прокуратура атқарылған жұмыстарға баға береді, қылмыстық істі сотқа жолдау немесе қайта тергеу мәселесін қарайды, сот сол дәлелдемелер негізінде үкім шығарады. Осылайша ішкі істер органдары мен жергілікті құрылымдар басы артық функциялардан арылып, құқық бұзушылықтың алдын алуда, болдырмауда қосымша өкілеттікке ие болды.
Ауданда полицияның сервистік желілері жұмыс істейді, олардың ауқымы кеңейтіліп, қылмыспен күресудің тәжірибесі молайып келеді. 18289 тұрғыны, 11 ауылдық округі бар ауданда Қорған және Түмен облыстарымен байланыстыратын шекара бекеттерінің бірі орналасқан. Маңызды көлік логистикасы өтеді. Осы себепті жергілікті полиция қызметкерлері республикалық, облыстық және аудандық маңызы бар автожолдарға, елді мекендердің көше-жол желісіне тұрақты негізде тексерулер жүргізеді, анықталған кемшіліктерді жою туралы нұсқамалар жібереді, инфрақұрылымды жетілдіру жөнінде ұсыныстар енгізеді. Жыл басынан бері 93 тексеру жүргізіліп, анықталған кемшіліктерді жою жөнінде 16 хат жолданды. Жаңа оқу жылы қарсаңында Дубровное, Михайловка, Новомихайловка, Леденево, Воскресеновка ауылдарындағы мектептердің жанындағы жол белгілері жаңартылды. Аудан орталығында 53 бейнекамера орнатылған. Олардың көмегімен жыл басынан бері 7 қылмыс ашылып, 750 құқық бұзушылық анықталды.
Данияр ҒАЛИАҚПАРОВ,
Мамлют аудандық ішкі істер бөлімі бастығының міндетін атқарушы, полиция подполковнигі.