Soltüstık Казахстан
Облысымызға жұмыс сапарымен Ішкі істер министрінің орынбасары Айдар Сайтбеков келді. Елордалық мейман полицияның бірқатар бөліністерінің қызмет атқару жағдайын және техникалық жарақтандырылуын тексерді. Азаматтардың құқықтарын қылмыстық қолсұғушылықтан қорғау жөніндегі міндеттерді орындау үшін материалдық-техникалық базаны нығайту қажеттігін атап өтті.
Ішкі істер министрінің орынбасары жедел басқару орталығында цифрландыру деңгейімен, бейнебақылау жүйелерінің жұмысымен танысты. Полицейлер облыс орталығындағы тәртіпті 228 айналмалы және 192 стационарлық бейнекамераның көмегімен бақылайды. Бұдан бөлек, полицияның бейнебақылау жүйесіне 249 мектеп пен 54 балабақша, негізінен тұрғын үйлердің аулаларында орнатылған 626 бейнебақылау камерасы қосылған.
Министрдің орынбасары жұмыс сапары барысында Жамбыл аудандық ішкі істер бөлімі бастығының орынбасары болған Ерік Оспановтың жесірі Аягөз Оспановамен кездесті. 2006 жылы жолдың қарсы бетіне шыққан мас жүргізушінің автокөлігіне соғылып, апат салдарынан полиция қызметкері қаза тапқан болатын. Аягөз Сұңғатоллақызының жеке баспанасы жоқ, Петропавл қалалық полиция басқармасында тергеуші болып қызмет атқарып жүрген ұлы Жасұланмен бірге ведомстволық жатақханада тұрады екен.
Айдар Сайтбеков қызметтік міндеттерін атқару кезінде қаза тапқан полиция офицерінің зайыбына бір бөлмелі пәтердің кілтін табыс етті. Ол Жасұланның әкесінің ісін лайықты жалғастырушы болатынына және қызметте жоғары жетістіктерге жететініне сенім білдірді.
Зарап ҚҰСАЙЫНОВ,
“Soltüstık Qazaqstan”.