Soltüstık Казахстан
С.Мұқанов атындағы облыстық ғылыми-әмбебап кітапханада мемлекет және қоғам қайраткері, ұстаз, ғалым, ақын, публицист, аудармашы Сұлтанбек Қожановтың туғанына 130 жыл толуына орай “Алаштың асыл азаматы” атты танымдық шара өтті.
Кітапхана қызметкері Майра Әшімова оқырмандарға Сұлтанбек Қожановтың өмірі мен қоғамдық-саяси қызметі, шығармашылығы туралы жан-жақты баяндады. Артына өшпес із, өлмес мұра қалдырған азаматтың қайраткерлік тұлғасына кеңінен тоқталды.
– Алаш ардақтысы 1922 жылы Түркістан республикасының Жер шаруашылығы халық комиссары болып тағайындалған. Осы қызметте жүріп ол ауыл ахуалына ерекше көңіл бөліп, өлкедегі жер-су реформасына тек таптық қана емес, сонымен бірге ұлттық сипат беру бағытын да ұстанды. Сұлтанбек Қожанов негізгі міндеттерін қоғамдық, ғылыми-шығармашылық жұмыстармен ұштастырып отырды. Мектепке арналған “Есептану құралы” атты оқулығы, “Түркістанның Кеңестік Автономиясының он жылдығына” атты орыс тіліндегі зерттеуі жеке кітап болып шыққан, – деді кітапханашы.
Кітапхана оқырмандарын “Есептану құралы” атты оқулықтың қалай жазылғандығы қызықтырды. Автор бұл туындысында арифметиканың қыр-сырын жан-жақты аша түскен.
Сұлтанбек Қожановтың ұлтқа сіңірген еңбегі орасан. Асыл тұлға Өзбек республикасында Қазақ автономиялық ауданын, Тәжік автономиялық облысын құру, қазақтар көп тұратын Қарақалпақ автономиялық облысын ұйымдастырып, оны Қазақ еліне қосу шараларын жүргізудің бел ортасында жүрді. Ол шын мәнінде қазақ жері-суы мен халқын бір шаңырақ астына жинаушы болды. Іргесі кеңейген үлкен Қазақстанды “Ұлттық Республика” деп атағысы келді.
Ақмарал ҚҰРМАНАЙҚЫЗЫ,
“Soltüstık Qazaqstan”.