Soltüstık Казахстан
Петропавлға ұлттық ғылыми-медициналық орталықтың кардиологтары келіп, туа біткен жүрек ақауы бар балаларға консультациялық кеңес берді. Жеті балаға Астанада ота жасалатын болды.
Облыстық көпбейінді балалар ауруханасы мамандарының айтуынша, өңірде 640 бала туа біткен жүрек ақауымен диспансерлік есепте тұр. Олар жергілікті дәрігерлердің ғана емес, еліміздегі жетекші медициналық орталықтар мамандарының бақылауында.
“Біз Петропавлға жыл сайын келіп, есепте тұрған сәбилерді тексереміз. Балаларды қабылдау кезінде кімге ота жасап, жоғары технологиялық емдеудің қажеттігін анықтап, іріктейміз”, – дейді Астана қаласындағы ұлттық ғылыми-медициналық орталықтың кардиохирургі Ринат Майоров.
Астанадағы ұлттық ғылыми-медициналық орталықтың кадиохирургі мен ультрадыбыстық зерттеу маманы 2-3 күн ішінде 159 баланы, соның ішінде ауылдардан 82 кішкентай сырқатты қабылдап үлгерді.
Ақерке ДӘУРЕНБЕКҚЫЗЫ,
“Soltüstık Qazaqstan”.