Soltüstık Казахстан
Өңірге гастрольдік сапармен Хадиша Бөкеева атындағы Батыс Қазақстан облыстық қазақ сазды-драма театрының ұжымы келді. Оралдан келген мәртебелі меймандарды жергілікті театр ұжымы сән-салтанатпен күтіп алды. Қызылжар вокзалында театр әртістері ән шырқап, шашу шашып, оралдықтарды тәтті-дәмдісімен қарсы алды.
“Қызылжардағы қазақ өнерінің қарашаңырағы – Сәбит Мұқанов атындағы облыстық қазақ сазды-драма театры еліміздегі көптеген мәдениет ошақтарымен байланыс орнатқан. Өзге өңірлердегі актерлер қауымы қызылжарлықтарды ойлы туындыларымен қуантуға асық. Орал театрын ерекше ықыласпен күтіп алдық”, – деді қазақ театрының директоры Біржан Жалғасбаев.
Гастрольдің алғашқы күні Орал театры Рақымжан Отарбаевтың пьесасы негізінде “Хан Жәңгір” реквиемін Мұқанғали Томановтың режиссерлігімен қойды. Хан Жәңгір – бойында жақсылығы мен жамандығы жарыса өріліп, атқарған ісінен орайына қарай осының екеуі де көрініс беріп тұратын халқымыздың тарихында өзіндік орны бар айтулы тұлға. Қойылым Жәңгір ханның жақсысын көріп, асқақтатып, аспанға шығармай, жаманын көріп, жатқа санап, жарға итермей, адамгершілікті биік парасаттылықпен тарихи бағасын беруді мақсат тұтады.
Шыңғыс Айтматовтың “Арманым – Әселім” туындысы да көрерменге ой салары анық. Белгілі туындының режиссері – Талғат Теменов.
Ақұштап Бақтыгереева, Мадина Омарованың “Жұбан” поэтикалық драмасының режиссері – Гауһар Адай. Қойылым Жұбанның Колбин алдында шыңғыртып тұрып шындықты айтатын, туған халқы үшін ұлттық державаға қасқайып қарсы шығатын жиналыстағы сөйлеген сәтінен бастау алады. Ақын бойына дарыған батырлықтың бастауы, өзгелерден оқ бойы озық тұруының сыры, асқақ рухының түпнегізі балалық және бозбала шағымен, ересек өмірімен астасып сипатталады.
Ал кішкентай көрермендер Ринат Сабырғалиевтің режиссерлігімен қойылған Гүлдана Қалдинаның “Жалқаудың жыры” ертегісін тамашалай алады.
Тәттігүл ЖАЛЕЛОВА,
Сәбит Мұқанов атындағы облыстық қазақ сазды-драма театры ақпараттық-техникалық бөлімінің меңгерушісі.