Soltüstık Казахстан
Айыртау ауданының әкімі Мейрам Меңдібаев өңірлік коммуникациялар қызметінде БАҚ өкілдерінің қатысуымен брифинг өткізіп, 9 айдағы әлеуметтік-экономикалық даму көрсеткіштерін баяндады.
Жыл басынан бері 41,7 млрд. теңгенің ауыл шаруашылығы өнімдері өндірілген. “Кең дала” бағдарламасы аясында 268 млн. теңгеге 6 шаруашылық қаржыландырылған. “Іскер жоба” шеңберінде шағын және орта бизнес саласына қолдау көрсетіліп, 20,5 млн. теңге мөлшерінде несие берілген.
“Биыл 530 мың тонна астық, 49,4 мың тонна майлы дақыл өнімдері жиналып, гектар берекелігі тиісінше 18,5 және 9,4 центнерден айналды. 4100 тонна ет, 27,4 тонна сүт, 7,6 млн. дана жұмыртқа өндірілді. 120 мың тонна шөп, 16,5 мың тонна пішендеме, 20,9 мың тонна сүрлем дайындалды”, – дей келіп, Мейрам Жақсылықұлы негізгі капиталға 13,5 млрд. теңге инвестиция құйылғанын, оның есебінен көкөніс сақтайтын қойма, биенің құрғақ сүтін өндіретін ферма салынып жатқанын жеткізді.
Баяндамашы өнеркәсіп, кәсіпкерлік, туризм салалары бойынша жеткен жетістіктерге де тоқталып өтті. Бүгінде 1692 шағын және орта бизнес субъектілері жұмыс істейді. 7 жобаны жүзеге асыруға 228 млн. теңге бөлініп, 17 жаңа жұмыс орны ашылған. “Бизнестің жол картасы” бағдарламасы бойынша 3,47 млрд. теңге қарастырылған.
Соңғы үш жылда тарихи, мәдени жерлерді тамашалауға келген туристердің саны екі есеге артып, 100 мыңға жеткен. Аудан аумағында күніне 4 мың адамды қабылдай алатын 46 туристік нысан құрылған. Туристік аймақты жаңғыртуға жарты млрд. теңге инвестиция бағытталған.
Тіркелген жұмыссыздардың саны – 645. Қоғамдық жұмыстарға 174 адам тартылған. 134 отбасыға атаулы әлеуметтік көмек берілген. Бизнес идеялар үшін 32,5 млн. теңгенің 22 гранты бөлінген.
Өмір ЕСҚАЛИ,
“Soltüstık Qazaqstan”.