Soltüstık Казахстан
Сафуан Шаймерденов атындағы қалалық классикалық гимназияда осыдан 5 жыл бұрын “Jiger” дебат клубы құрылды. Клуб мүшелері апта сайын бас қосып, қоғамдағы өзекті тақырыптарды ортаға салуды дәстүрге айналдырған. Дебат дегеніміз – нақты құрылымдалған және арнайы ұйымдастырылған қоғамдық пікір алмасу, өзекті тақырыптар бойынша екі тарап арасындағы пікірталас. Қарапайым сөзбен айтқанда пікір алмасу алаңы саналады. Кей мамандар дебатқа “көзқарастар бәсекесі” деген анықтама берген.
Біздің мектебімізде дебат клубы өз жұмысын қазақ, орыс және ағылшын тілдерінде жүргізеді. Үйірменің басты мақсаты – адами құндылықты жанына серік еткен, айналасына сын көзбен қарап, қоғамдық өмірге белсене араласатын жастардың жаңа буынын қалыптастырып, оқушылардың сыни ойлай алу қабілетін дамыту. Үйірменің міндеттері қарапайым болғанымен, олар әр баланың өмірлік көзқарасының қалыптасуына ерекше ықпал етеді.
“JIGER” Дебат клубы 5 жылдың ішінде көптеген жетістіктерге жетті. Қазақ лигасының дебатерлары қалалық, облыстық деңгейдегі турнирлердің бірнеше рет жеңімпазы атанды. 2023-2024 жылдары республикалық деңгейдегі “Jana kozkaras 2023”, “KK 2024”, “QDC 2024” турнирлеріне қатысып, жүлделі орындарға ие болды. Биыл “Үздік спикер” номинациясын жаңадан қатарымызға қосылған жас дебатер Айлана Бауенова алды. “Трикс” фракциясы қала мектептері арасында жолдастық кездесуге қатысып, І орынды иеленді. Орыс лигасының дебатерлары қалалық, облыстық деңгейде жеңімпаз атанды. Ағылшын лигасының дебатерлары да қалалық, облыстық деңгейдегі турнирлерде үздіктер қатарынан көрініп қана қоймай, биылғы жылы төрешілікке шақырту алып, “Үздік төреші” номинациясына ие болды.
“JIGER” дебат клубы – білімнің гуманитарлық жүйесін нақты көздейтін жаңа бағыттағы үйірме. Пікірсайыстарға дайындық барысында оқушылар белгілі бір тақырып бойынша мәлімет жинастырып, оларды қарама-қарсы бағыттарды қолдайтын екі түрлі позицияға арналған жоспарға топтастырады. Олар – жақтау және даттау топтарының кейстері. Жалпы пікірталас, тақылау, дискусия, диалог, бір мәселені көпшіліктің талқысына салу – ақиқатқа жетудің ең кең тараған және оң нәтиже бере алатын формасы саналады. Бізді қандай да бір тақырып талқыға салынғанда оның қоғамға пайдасы туралы айтуға құштар жастардың көбейіп келе жатқанын қуантады.
Диана ҚАЙЫРГЕЛДИНА,
Сафуан Шаймерденов атындағы қалалық классикалық гимназия жанынан құрылған “JIGER” дебат клубының координаторы.