Soltüstık Казахстан
Өңірде интернет алаяқтардан зардап шегушілер саны азаяр емес. Алдын алу жұмыстары жүргізілгенімен биылғы он айда осы қылмысқа қатысты 606 дерек тіркелген.
Көліктегі полиция департаменті Петропавл станциясындағы желілік полиция бөлімінің мәліметінше, былтыр өңір тұрғындары интернет алаяқтардан 577,5 млн. теңге шамасында шығын шексе, биыл қаңтар-қыркүйек айлары аралығында 660 млн. 330 мың теңгелерінен айырылған. Полицияға күнде 5 адам өзін интернет алаяқтардың алдағандығы туралы айтып хабарласады екен.
“Біз жуырда Оңтүстік-Орал темір жолы Петропавл бөлімшесі жұмысшыларымен кездесіп, алаяқтар жиі қолданатын тәсілдер жайында айтып, түсіндірдік. Содай-ақ пойыздарда жолаушылармен кездесіп, буклеттер тараттық”, – дейді бөлімнің жедел уәкілі Азамат Раев.
Маманның айтуынша, ер адамдар көп жағдайда “Kolesa.kz” сайтында жарияланған жалған хабарландырулар арқылы алаяқтарға жем болып жатады. Сондай-ақ оларға “банктің қауіпсіздік қызметінен” хабарласатындар көп. Әйелдер көбіне әлеуметтік желі арқылы сауда жасап, алданады. Ал жастарды, студенттерді курьер-дроппер болуға тартады.
Қазан айының басында Петропавлдың 63 жастағы тұрғынына белгісіз адам хабарласып, өзін “Ұлттық банктің қызметкерімін” деп таныстырған. Қала тұрғынының атына 3 млн. теңге несие ресімделгенін, алаяқтар ол ақшаны ала алмау үшін “Хоптудеск” қосымшасын жүктеу қажеттігін айтқан. Зейнеткер нұсқауларға сүйене отырып, бағдарламаны ұялы телефонға жүктейді. Біраздан кейін оның шотындағы 740 мың теңге ақша жоғалған.
Ақерке ДӘУРЕНБЕКҚЫЗЫ,
“Soltüstık Qazaqstan”.