Soltüstık Казахстан
Ғабит Мүсірепов атындағы облыстық балалар мен жасөспірімдер кітапханасында көрнекті жазушы, қазақ прозасының негізін қалаушы Бейімбет Майлиннің 130 жылдығына арналған “Халық үшін туған талант” атты еске алу шарасы өтті.
Бейімбет Майлин ХХ ғасырдың басындағы терең толқулар мен тартысқа толы төңкерістердің шындығын, тұрмыстың ауырлығын, тағдырдың тауқыметін көркем тілмен жаза білді. Жазушының кейіпкерлерінің барлығы өмірден алынған, туындылары шынайы оқиғаға негізделген. Қаламгер шығармаларына Қостанай атырабы, арнасы толған Торғай, Тобылдың тасасы мен ағысы баяу Аят өзені жағалауына қонған жұрттың тіршілігі арқау болды.
Шараға қатысқан меймандар қаламгер өміріне терең бойлады. Журналист Өмір Есқали асыл тұлғаның сауатсыздықты жою ұраны жайлы әңгімелеп, 1929 жылы жарық көрген “Сауаттылығы төмендерге арналған оқу кітабы”, 1930 жылы баспадан шыққан “Күш” – сауаттылығы төмендерге арналған оқулық” туындыларының мазмұнымен таныстырды. Жазушының көркемсөздің зергері Ғабит Мүсіреповпен бірге “Сауатсыздарға арналған әліппені” жазғаны сөз болды.
Ғабең бір естелігінде: “…Бейімбеттің “Қазақ қызы”, “Қызыл жалау” дейтін романдарын қатарға қоса алмадым…” деп өкінген екен. Жазушының қиын-қыстау жылдары кім көрінгеннің қолында кеткен туындылары аз емес. Шара қонақтары: “оларды зерттеу, қаламгер өміріне терең үңілу бейімбеттанушылардың негізгі міндеті” деген ой түйді.
Жиын соңында зиялы қауым өкілдері мен М.Жұмабаев атындағы жоғары колледждің студенттері “Талант тұлғасы” атты көрмемен танысты.
Құралай БАЗАРБЕКОВА,
Ғабит Мүсірепов атындағы облыстық балалар мен жасөспірімдер кітапхананың кітапханашысы.