Soltüstık Казахстан
“Нұра топтық су құбыры” шаруашылық жүргізу құқығындағы республикалық мемлекеттік кәсіпорны “Есіл су” филиалының мамандары Ұлы Отан соғысының ардагері Василий Макиенкомен кездесті. Шараға алдыңғы толқын өкілдері де қатысты. Жиын барысында облыстық ардагерлер кеңесінің төрағасы Ескендір Елеусізов Василий Васильевичке “Беларусьтің фашистік басқыншылардан азат етілгеніне – 80 жыл” медалін және Беларусь басшысы Александр Лукашенконың құттықтау хатын табыстады.
– Құрметті Василий Васильевич! Сізді Беларусьтің фашистік басқыншылардан азат етілгеніне 80 жыл толуымен шын жүректен құттықтаймын! Бұл мереке Беларусь мемлекетінің мызғымастығын бейнелейді. Сіздің бейбіт заманның орнауы жолындағы ерлігіңіз жастарға үлгі. Ұйқымыздың тыныштығы, жақындарымыздың шат күлкісі, бейбіт өмір үшін сізге шексіз алғыс айтамыз, – делінген құттықтауда.
Шарада сөз алған Ескендір Есмақұлы облыстық ардагерлер кеңесі алдағы жылы тойланатын Жеңістің 80 жылдығына қызу дайындалып жатқанын атап өтті. Кеңес төрағасының орынбасары Анатолий Корабельников Беларусьті азат етуге байланысты оқиғаларға шолу жасады. Одан бөлек “Есіл су” кәсіпорны бастауыш ардагерлер ұйымының төрағасы Дулат Қалиев пен “Беларусь” этномәдени орталығының жетекшісі Мария Татаренко сөз сөйледі.
Василий Макиенко 1926 жылы 24 қаңтарда Есіл ауданындағы Волошинка ауылында дүниеге келген. 1943 жылы 4 қазанда Октябрь (қазіргі Шал ақын) аудандық әскери комиссариаты арқылы әскер қатарына шақырылған. 3-ші Беларусь майданы құрамында 163-гвардиялық атқыштар дивизиясының 317-гвардиялық атқыштар полкінде жасақ командирі қызметін атқарды. 2-дәрежелі “Отан соғысы” орденімен, “Кенигсбергті алғаны үшін”, “Германияны жеңгені үшін”, “Тың жерлерді игергені үшін”, “Астанаға 10 жыл” төсбелгілерімен, мерейтойлық медальдармен марапатталған. Ұзақ жылдар бойы “Есіл су” кәсіпорнында жұмыс істеген майдангер бүгінде мекеме жанындағы ардагерлер ұйымының мүшесі.
Рабиға ЕРАЛЫ,
“Soltüstık Qazaqstan”.
Суретті түсірген Шыңғысхан БЕКМҰРАТ.