Soltüstık Казахстан
Тараз қаласында 7-9 қараша күндері қазақ күресінен ересектер (ерлер мен әйелдер) арасында ел чемпионаты өтіп, солтүстікқазақстандық балуандар жарыстан олжалы оралды.
Чемпионатқа Астана, Алматы және Шымкент қалалары мен еліміздің 17 облысынан 450 балуан қатысып, кіл мықтыда кім мықтыны анықтады. Дүбірлі додада “Қызылжар арландары” спорт клубының мүшелері жеңіс тұғырынан көрінді. 66 келі салмақ дәрежесінде Нұрғали Тұрсынғазиев чемпион атанса, “Түйе балуан” атағы үшін сайыста Алтынбек Аусағитов екінші орынға ие болды.
Қазіргі таңда әлемнің қырықтан астам елінде қазақ күресі федерациялары жұмыс істейтінін айта кеткен жөн. Он рет әлем чемпионаты, он екі рет Азия чемпионаты, алты рет әлем кубогы, алты рет Еуропа чемпионаты өткен болатын. 2023 жылы төл күресіміз тұңғыш рет Эр-Рияд қаласында өткен Дүниежүзілік жекпе-жек ойындарының бағдарламасына енді.