Soltüstık Казахстан
Биылғы жылы университетте өткен сапа апталығының тақырыбы дуальды оқытуға арналды. Бұл апта аясында университетте қазақ, орыс және ағылшын тілдерінде офлайн және қашықтықтан 30-ға жуық іс-шара ұйымдастырылды. Әрбір іс-шараның мақсаты – білім сапасын арттыру, студенттердің теориялық білімін тәжірибемен ұштастыру, сондай-ақ профессор-оқытушылар құрамының біліктілігін арттыру. Бұл шаралар арасында “дөңгелек үстелдер”, ашық сабақтар, викториналар мен конференциялар болды. Мұндай іс-шаралар студенттерге практикалық дағдыларды игеруге, жаңа білім алуына және өздерінің кәсіби әлеуетін дамытуға мүмкіндік берді.
Апталықтың маңызды ерекшелігі – Малайзия мен Польшадан келген шетелдік профессорлардың қатысуымен өткен ашық дәрістер мен оқытушылар құрамының біліктілігін арттыру курстары. Бұл халықаралық тәжірибе студенттер үшін құнды. Шетелдік мамандар мен ғалымдар өздерінің тәжірибелерін, қазіргі білім беру жүйесінің жаһандық үрдістері туралы ой-пікірлерімен бөлісті. Олар дуальды оқытудың тиімділігін, студенттердің практикалық білімдерін арттырудың жолдарын талқылады.
Университетіміздің серіктестері болып табылатын Петропавл қаласындағы кәсіпорындар мен білім беру ұйымдары бұл іс-шараларға белсене қатысып, өз тәжірибелерін студенттермен бөлісті. Мәселен, аймақтық кәсіпорындарда, мектептер мен колледждерде тәжірибелік сабақтар ұйымдастырылып, дуальды оқыту жүйесі арқылы студенттер мен жұмыс берушілер арасында тікелей байланыс орнатылды.
Сондай-ақ сапа апталығында өңір мектептері мен колледж басшыларының қатысуымен ұйымдастырылған диалог алаңдары өтті. Бұл алаңдарда дуальды оқыту, тағылымдама және жұмысқа орналастыру мәселелері кеңінен талқыланды. Жұмыс берушілер мен білім беру мекемелерінің өкілдері өзара пікір алмасты, сол арқылы аймақтағы білім беру жүйесін жақсарту бағытында жаңа ұсыныстар мен шешімдер қабылданды. Бұл кездесулердің басты мақсаты – білім беру мен жұмыс нарығын байланыстыру, жас мамандарды сапалы даярлау.
Сапа апталығының қорытынды кезеңінде “Музыкалық пәндер” кафедрасы мен Ермек Серкебаев атындағы өнер колледжі “дөңгелек үстел” ұйымдастырды. Онда “Дуальды білім берудің негізгі принциптері мен мәселелері” тақырыбы талқыланды. Дуальды оқыту жүйесінің негізгі артықшылықтары мен қазіргі білім беру жүйесіне оның ықпалы туралы пікірлер айтылды. Ермек Серкебаев атындағы өнер колледжінің қатысушылары өнер саласында дуальды білім берудің маңыздылығын атап өтіп, осы жүйені енгізу арқылы шығармашылық мамандықтар бойынша білім беру сапасын арттыру мүмкіндіктері туралы ой-пікірлерімен бөлісті.
Сапа апталығының нәтижесінде университетіміздегі дуальды оқыту жүйесі туралы көп ақпарат пен тәжірибе жинақталды. Бұл іс-шаралар білім беру саласындағы жаңа бастамаларды іске асыруға бағытталған бірқатар маңызды қадамдарды жүзеге асыруға мүмкіндік берді.
Диана ХАЛИМОВА,
М.Қозыбаев атындағы СҚУ медиа-орталығының бас редакторы.