ТІРЕК МЕКТЕПТЕР – АУЫЛДЫҢ ТІРЕГІ

Премьер-министрдің орынбасары Тамара Дүйсенованың Солтүстік Қазақстан облысына жұмыс сапары маңызды әлеуметтік нысандарды аралаумен жалғасты. Кездесулерде Президент тапсырмаларының іске асырылуы, Үкіметте қабылданған шешімдер мен өзекті мәселелер талқыланды.

Мектеп пен балабақшадағы кез­десумен қатар вице-премьер жоға­ры құрылыс-экономикалық кол­лед­жінде дуалды оқыту жүйесімен танысты. Колледжде сантехникалық, дәнекерлеу, ағаш өңдеу, тас өңдеу және аспаз мамандықтары бойынша кадрлар даярланады. Вице-премьер колледждің зама­науи құралдармен жабдықталған шеберханаларында оқыту барысымен танысып, студенттермен әңгімелесті.

Колледжде техникалық және кәсіби білім беру ұйымдарының басшыларымен кездесу ұйым­дастырылды. Онда жұмысшы мамандарды оқыту жүйесін реформалауға қатысты мәселелер талқыланды. Тамара Дүйсенова колледждер өңір үшін кадр даярлаудың негізгі базасы болуға тиіс екенін жеткізді.

Қазіргі таңда облыста 24 колледж бар, оларда 11 мыңнан астам студент білім алуда. 13 колледж жұмысшы мамандықтары бойынша жастарды оқытады, колледждер мен кәсіпорындар арасында 1726 келісімшарт жасалған. Түлектердің жұмысқа орналасу дең­гейі 97 пайызды құрайды.

“Білім беру жүйесі өзара байла­нысты, бірізді және тұлғаны дамытуға арналған көпдеңгейлі жүйе болуы тиіс. Бұл процесс барысында педагогтардың атқарар рөлі зор. Мен олардың еліміздің лайық­ты азаматтарын тәрбиелеу үшін бар күшжігерін жұмсайтынына сенемін”, – деді вице-премьер.

Сонымен қатар Тамара Дүй­сенова өңірдегі “Ауыл аманаты” жобасының іске асырылу бары­сымен танысты. Ауыл тұрғын­да­рының табысын арттыру ауыл­дық округтердің әкімдеріне қойылатын басты міндет болуы керек. “Ауыл аманаты” жобасы осы мақсатты жүзеге асыру үшін нақты мүмкіндіктер ұсынады.

Өңірде бағдарлама аясында 236 жеңілдетілген несие беріліп, 250 жұмыс орны ашылған. Жү­зеге асырылып жатқан жобалар әртүрлілігімен ерекшеленеді. Мы­салы Қызылжар ауданының орталығы – Бескөл ауылының тұрғыны Сара Сатыбалдина ша­ғын құс фермасын ашып, күніне 600 данаға дейін жұмыртқа сату­ды бастады. Ол ветеринария са­ласындағы тәжірибесіне сүйе­ніп, ферманың жұмысын тиімді ұйымдастырып отыр.

Ал Явленка ауылының тұр­ғыны Жомарт Шамшуменов асыл тұқымды мал шаруашы­лығын дамытып, шағын тауарлы ферма құрды. 2,5 пайызбен алынған жеңілдетілген несиеге ол 8 бас ірі қара, 24 қой және мал азығын сатып алған. Болашақта сүт өндірісін қолға алып, жерлес­теріне тауарлық несие беру­ді жоспарлап отыр.

“Ауыл аманаты” бағдарла­ма­сы мен үшін өте тиімді. Төмен пайыздық мөлшерлеме және қарызды өтеудің жеңіл шарттары қарастырылған. Мен қарыз­ды келер жылдан бастап өте­мекпін”, – деді Жомарт Шамшу­менов.

Есіл ауданындағы Явленка ауылында кәсіпкерлер әлеумет­тік жауапкершілік үлгісін көрсе­туде. Жергілікті наубайхана мен ірі серіктестік арасындағы ме­мо­рандум арқасында ауыл тұр­ғындары нанды арзан бағамен сатып алады. “Егін” серіктестігі жергілікті наубайхананы арзан­датылған ұнмен қамтамасыз етуде, бұл нан бағасының тө­мендеуіне әсер еткен. Наубайхана күніне 3 мың бөлке нан пісі­реді.

“Біз ұн мен нанды арзан ба­ғамен сатсақ та пайда табамыз. Бір мүддені көздеген кәсіпкер­лер­дің ортақ мақсатқа бірігуі ма­ңызды. Осы ауылда тұрғандықтан жерлестерімізге көмек көр­сетуді міндетіміз санаймыз”, – деді “Егін” серіктестігінің бас ди­ректоры Евгений Чубыкин.

Өңірдің барлық деңгейдегі әкімдерімен өткен кеңес бары­сында ауыл шаруашылығы ми­нистрінің орынбасары Ербол Тасжүреков “Ауыл аманаты” бағ­дарламасының іске асу барысы туралы баяндады.

Түркістан және Қызылорда облыстарынан келген кәсіпкер­лер өз тәжірибелерімен бөлісіп, ауыл әкімдерінің сұрақтарына жауап берді, қажетті кеңес бе­ру­ге дайын екендіктерін білдірді. Тамара Дүйсенова кәсібін жаңа бастаған адамдар үшін өнімді сату жолдарын ұйымдастыру­дың маңызына ерекше көңіл бөл­ді. Сонымен қатар ауылдағы тұр­мыс сапасын жақсартуда ауыл әкімдерінің жауапкершілігі зор екеніне тоқталып, халық ара­сын­да ауқымды түсіндіру жұмыстарын жүргізудің қажеттігін атап өтті.

“Ауыл әкімдеріне мемле­кет­тік қолдау шаралары, соның ішін­де жеңілдетілген несие, суб­сидияланатын жұмыс орында­ры, жастар мен әлеуметтік аз қамтылған азаматтарға арнал­ған қайтарымсыз гранттар тура­лы ақпаратты жақсы білу өте ма­ңызды. Бұл бағдарламаларды дұрыс пайдалану ауыл тұрғындарының өмірін айтарлықтай жақ­сартуға мүмкіндік береді”, – деді вице-премьер.

Солтүстік Қазақстан облы­сында әлеуметтік жобалардың іске асырылуын тексеру Тамара Дүйсенованың жұмыс сапары барысындағы негізгі міндеттерінің бірі болды. Облыс әкімі Ғауез Нұрмұхамбетовпен бірге Үкімет басшысының орын­ба­са­ры “Экология медицина” серік­тестігінің әлеуметтік дәріхана­сында таңбаланған дәрі-дәрмек­терді беру процесін тексерді. Желі 10 нысаннан тұрады және бүгінге дейін мұнда 100 түрлі таң­баланған дәрілік заттар жеткізіл­ген. Компания директоры Ев­гения Лямкинаның сөзінше, таңбаланған дәрілерді сканер­леу арқылы әр тұтынушы өнім туралы толық ақпарат ала алады.

Қазіргі уақытта облысқа 357 мың қорап таңбаланған дәрі-дәрмек жеткізілген. Барлық 25 медициналық ұйым 2D-сканерле­рімен және деректер жинау терминалдарымен жабдық­тал­ған, сондай-ақ тауарларды таң­балау және қадағалау жүйе­ле­ріне интеграцияланған.

Көпсалалы облыстық ауру­хана базасында медициналық мекеме басшыларымен өткен кеңесте Тамара Дүйсенова өңір­дегі денсаулық сақтау жүйесінің дамуын талқылады. Салада оң өзгерістер байқалуда. Облыс ор­талығында 2 емхана ашылса, жыл соңында Кішкенекөл ауы­лында медициналық нысанның құ­рылысы аяқталады. Медици­на­лық жабдықтарды жаңартуға 5 млрд. теңге бөлінді, аурухана­ларда УДЗ, цифрлық рентген аппараты, ӨЖЖ аппараттары және маммографтар орнатыл­ды. Ал шалғай ауыл тұрғындары үшін телемедицина бойынша қа­натқақты жоба жүзеге асуда.

Тамара Дүйсенова медици­на­лық қызмет көрсету сапасын арттыру, әсіресе ауруларды ерте кезеңдерде анықтауға мән беру қажеттігін атап өтті. Жиын­да міндетті әлеуметтік медици­налық сақтандыру мәселесі де қозғалды. Вице-премьер сақ­тандырылған азаматтар барлық қажетті медициналық қызмет­терге қол жеткізе алатындығын жеткізді.

Президент тапсырмасы бойын­ша “Ауылда денсаулық сақтауды жаңғырту” жобасы жү­зеге асырылуда. Өңірдің 46 ауы­лында 5 жаңа дәрігерлік амбула­тория, 19 фельдшерлік-акушерлік және 23 медициналық пункт салынуда. Олардың кейбірі қол­данысқа берілген. Мысалы Пресновка ауылының тұрғында­ры үшін жаңа фельдшерлік-аку­шерлік пункттің қолданысқа берілуі қуанышты жаңалық бол­ды. Аталған елді мекенде 700-ге жуық адам тұрады. Ауыл тұр­ғындары бұрын медициналық кө­мек алу үшін об­лыс орталы­ғына баруға мәжбүр болатын. Енді жаңа ФАП арқы­лы барлық ал­ғашқы медицина­лық көмек түрі жергілікті жерде көрсетіледі. Та­мара Дүйсенова медицина­лық нысанның жаб­дықта­луы­мен та­нысып, қызмет­керлер­мен әңгі­мелесті. Соны­мен қатар ауыл тұрғындарымен кездесіп, скри­нингтік шаралар­ды жақсар­ту және ФАП-ты қа­жетті медици­налық жабдықтар­мен қамтама­сыз ету бойынша тап­сырма берді.

Президент ауылдардағы бі­лім беру мекемелерінің қала мек­тептерінен еш кем болмауы ке­рек екенін атап өтті. Осы мақ­сатта “Тірек мектептер” жобасы жүзеге асырылуда. Оның бірі Есіл ауданындағы Явленка ауы­лында орналасқан. Білім беру саласын тұрақты дамыту қоры және “Қазақстан халқына” қоры­ның қолдауымен мектепке зама­науи оқу жабдықтары сатып алынды. 16 интерактивті па­нель, STEM кабинеті, робото­тех­ника жабдықтары және еңбек сабағына қажетті құралдар жет­кі­зілді. Онлайн-сабақтарды жазу үшін телестудия ұйымдастырылды. Мектеп мұғалімдері На­зарбаев зияткерлік мектепте­рінде әдістемелік көмек, қолдау және білім беру бағытында оқытылды. Мектепке 4 магнитті шағын жинақты мектеп бекітілген, олардың оқушылары ақпарат­тық технологиялар мен жаңа жабдықтарды енгізудің арқасында сапалы білім беру ресурста­рына кеңінен қол жеткізе алады. Тамара Дүйсенова негізгі оқу пәндерінен басқа робототехни­ка және технологиялармен бел­сенді айналысатын оқушылар­мен әңгімелесті. Олардың кей­бір жобаларымен танысып шық­қан вице-премьер оқушыларға белсенділігі үшін алғыс айтып, болашақ бастамаларына сәт­тілік тіледі.

“Оқушылар үшін жайлы жағдай жасау – біздің басты мақсатымыз. Заманауи жабдықталған оқу кабинеттері, әдістемелік кө­мек – бұл мұғалімдерге де, оқу­шыларға да қосымша қолдау”, – деп сөзін қорытындылады Тамара Дүйсенова.

Қазақстан Республикасы

Премьер-министрінің ресми ақпараттық ресурсы.