Soltüstık Казахстан
Облыс әкімі Ғауез Нұрмұхамбетов елордадағы орталық коммуникациялар қызметінде өткен брифингте Қызылжар өңірінің әлеуметтік-экономикалық дамуы туралы баяндап, үстіміздегі жылы атқарылған жұмыстарға, алда тұрған міндеттерге тоқталды.
Өңір басшысы өз баяндамасын биылғы көктемгі су тасқынының зардаптарын жою бағытында атқарылған шаруалардан бастады. Әкімнің айтуынша, облысқа 3,5 млрд. текше метр қызыл су келіп, өңірдің инфрақұрылымы біршама зардап шеккен.
– Қиын сәтте қызылжарлықтарға еліміздің барлық өңірі қол ұшын созды. Облыс жұртшылығы ауызбіршілік танытып, сынақтан мүдірмей өтті. Мемлекет басшысы облысымызға келген сапарында апатпен күреске атсалысқан барша азаматқа алғысын білдірді. Ақшалай өтемақы толық көлемде төленді. Уәде бергеніміздей, үйлері суға кеткен тұрғындардың барлығы баспана алды. Петропавлда “Бірлік” деп аталатын жаңа шағынаудан бой көтерді. Онда қазір 700 отбасы тұрып жатыр”, – деді өңір басшысы. Одан бөлек су тасқынынан зардап шеккендер үшін 1394 пәтер сатып алынған.
Облыс экономикасына көктемгі су тасқыны мен оның салдары әсер етпей қойған жоқ. Дегенмен есепті кезең ішінде негізгі салалар бойынша оң өсім байқалды.
– Биылғы он айдың қорытындысы бойынша ауыл шаруашылығы саласы 130,2, өнеркәсіп – 100,1, құрылыс – 127,3, пайдалануға берілген тұрғын үйлер – 122,9, инвестициялар – 109,4 пайыз өсім көрсетті. Агроөнеркәсіптік кешен өңір экономикасының басты саласы болып қала береді. Президентіміз ауыл шаруашылығы өнімін 2 есеге ұлғайту міндетін қойды. Өңірдің бұл мақсатқа қол жеткізу әлеуеті айтарлықтай жоғары, – деді Ғауез Нұрмұхамбетов.
Өңір басшысы биыл облыс диқандары егін жинау науқанында рекордтық көрсеткішке қол жеткізгенін айтты.
Соңғы үш жылда облыста үш жаңа мектеп іске қосылды. Апатты жағдайдағы мектептер мәселесі биыл толықтай шешілген. Білім беру саласына бюджеттің үштен бір бөлігі бағытталған. Білім ошақтарының материалдық-техникалық базасын нығайту үшін 6,4 млрд. теңге бөлінген. Мектептерге 42 автобус сатып алынған. 53 білім беру нысанына күрделі жөндеу жүргізілді. Президенттің тапсырмасы бойынша өңірде “Жайлы мектеп” ұлттық жобасы жүзеге асырылуда.
“Ауылдық денсаулық сақтауды жаңғырту” жобасы аясында өңірде 46 нысан салу жоспарланған болса, былтыр соның сегізі аяқталған. Биыл отыз сегіз мекеменің құрылысы жүргізіліп жатыр. Қалада балаларға арналған 16 оңалту орталығы ашылды. Франциямен серіктестік аясында 16 телемедициналық кешен орнатылды. Бұл ауылдағы ағайынға сапалы көмек беруге жол ашады.
“Мемлекет басшысы халыққа арнаған биылғы Жолдауында 2025 жылдың соңына қарай халықтың сапалы ауыз суға қолжетімділігін толық қамтамасыз ету міндетін жүктеген болатын. 2022 жылмен салыстырғанда биыл сумен жабдықтау нысандарын салуға, жаңғырту және жөндеуге 2 есе көп қаражат қарастырылған. Жыл соңына дейін халық саны 10 мыңнан асатын 66 ауылдық елді мекенде кешенді блок-модульдер орнату жоспарланған”, – деді Ғауез Торсанұлы.
Облыс халқының 42 пайыздан астамы спортпен шұғылданады. 2025 жылдың соңына дейін бұл көрсеткіш 50 пайызға дейін артады. Осы мақсатты жүзеге асыру үшін облыс аудандарында екі дене шынықтыру-сауықтыру кешені, екі жабық хоккей корты және тренажер залы бар жабық жүзу бассейні салынуда. “Алаң” бағдарламасы бойынша Петропавлдағы футбол алаңдары жаңартылуда.
Брифингке қатысқан республикалық басылымдар мен телеарналар тілшілерінің сауалдары жауапсыз қалған жоқ.
Зарап ҚҰСАЙЫНОВ,
“Soltüstık Qazaqstan”.