Soltüstık Казахстан
Жерлесіміз Наталья Богданова Чиангмада (Таиланд) өтіп жатқан бокстан Азия чемпионатында алтыннан алқа тағынды.
70 келі салмақ дәрежесінде өнер көрсеткен жерлесіміз құрлық біріншілігінің ақтық сайысына дейін қарсыластарын айқын басымдықпен тізе бүктірді. Финалдық кездесуде шаршы алаң иесі Маникон Байсонмен жұдырық түйістірді. Ол жергілікті спортшыға еш мүмкіндік берместен 3:0 есебімен жеңіске жетті. Жартылай финалда да солтүстікқазақстандық спортшы Украинаның мықты боксшысы Анастасия Черноколенкоға өзінің күшті екенін дәлелдеген болатын.
Былтыр өткен Азия чемпионатында Наталья Богданова қола жүлдегер атанған еді. Жиырма бес жастағы спортшы бұған дейін де бірталай додада өзінің жетістіктерімен қуантқан болатын. Тынымсыз еңбектің арқасында намысты қолдан бермей жүрген спортшының жетістікке жету жолы өзгелерге үлгі екенін айту керек. Ол 18 жасында «Олимп» БЖСМ-де жаттығуды бастап, аз уақыт ішінде үлкен биікке көтерілді. Кикбоксингтен халықаралық дәрежедегі спорт шебері, осы спорт түрінен әлем кубогының иегері атанды. 2021 жылы бокстан Қазақстан чемпионатында қола медаль жеңіп алса, 2022 жылы күміс жүлде иеленді.
Марат ШЫНТЕМІРОВ.