Soltüstık Казахстан
Еңбек жолым еліміз Тәуелсіздік алған тұстағы экономикалық қиындықтармен тұспа-тұс келгендіктен, кейде өткен өмір жолымды ойша шолсам, осыншама ауыртпалықтарды шыдамдылықпен көтере білген халқымыздың қажыр-қайратына сүйсінемін. Ол кезеңде «Беловский» кеңшарының әбден тұралап қалғаны соншалық, бұрқ-сарқ қайнап жататын қызу тірлік пышақ кескендей тыйылып, тұрғындардың жақсы тұрмыс іздеп, жан-жаққа үдере көшкені әлі күнгідей есімде.
Жер-ананы еміп өскен агроном мамандығының иесі болғандықтан, ешқайда кетпеуді, жаныма бір табан жақын егіншіліктен қол үзбеуді құп көрдім. Жаппай жұмыссыздық салдарынан шаңырағы шайқалған кеңшардың орнына алдымен шаруа қожалығын, сосын «Белое-Агро» серіктестігін ұйымдастырып, тепсе, темір үзетін өзім құралыптас азаматтармен бірге тың іске үлкен ынта-жігермен бел шешіп, кірісіп кеттік. Айтуға ғана оңай, ал шын мәнінде тау қопарарлық асу-белестерді бастан өткеріп, қанша мехнат көрсек те, болашаққа деген берік сенім отын өшірген жоқпыз. Шаруашылығымыздың түтіні түзу ұша бастаған соң астық өсіретін алқаптың көлемі 6 мың гектарға дейін ұлғайып, 2,7 мың гектарына – бидай, қалғанына майлы дақыл, жемшөп, арпа себілді. Мемлекет тарапынан рәсімделген жеңілдікті несие арқылы Даниядан, АҚШ-тан әукесі жер сызған асыл тұқымды ангус сиырлары сатып алынып, қазір саны 600-ге жуықтап қалды. Лизинг бағдарламасы аясында техникалық парк толық жаңартылды. Өз қолымыз өз аузымызға жетті деген осы. Мұның бәрі– жаңа тұрпатты егеменді мемлекет құрып, үздіксіз дамуымыздың арқасы!
Щучье – 40 үйлі, тұрғыны 130-дан аспайтын шағын ғана елді мекен. Еңбекке қабілетті тұрғындардың негізгі бөлігі тұрақты жұмыспен қамтылған. Жұмысшы лардың орташа айлық табысы 200 мың теңгеден кем емес. Осында тұратын аз қамтылған отбасыларға, қарттарға, еңбек ететін адамдарға әлеуметтік қамқорлық жасау үрдісі жүйелі түрде жалғасын тауып келеді. Иесіз қалған клуб қалпына келтіріліп, жастар да, аға буын өкілдері де бос уақыттарын, мерекелік іс-шараларды осында өткізеді. Үйірмелерде шығармашылықпен емін-еркін айналыса алады. Тәжірибелі мамандар мен жұмысшылар қатарын толықтыру, тұрақтандыру мақсатымен оларға арнап кірсе, шыққысыз жеке үйлер тұрғызылды. Үш жыл бұрын аукцион арқылы жалпы аумағы 1,5 мың шаршы метр мектеп ғимараты сатып алынып, демалыс орталығына айналдырылды. Онда спорт залы, фельдшерлік акушерлік пункт жұмыс істейді. Бұдан бөлек, ауылда дүкен, шағын орталық, өнімді қайта өңдеу цехы, бильярд және банкет залдары, қонақүй, сауна бар. Ауылды абаттандыруға, көше жолдарын күтіп-ұстауға, санитарлық тазалыққа айрықша мән беріледі.
Тәуелсіздікті тұғыры биік мереке ретінде ұлықтайтынымыз, қазақ халқы жаһандану үрдісіне жұтылып кеткен жоқ. Ұлы уақыт көшіне ілесіп, өзгелермен терезесі тең ел ретінде өркениетті даму жолына түсті. Халқымыздың еңсесі көтеріліп, тұрмысы жақсарды, жүзі жарқын, келешегі кемел. Егемендігімізді одан әрі баянды ету, өскелең ұрпаққа аманаттау– бәріміздің басты борышымыз.
Талғат ӘЛЖАНОВ,
«Белое-Агро» ЖШС директоры.
Мамлют ауданы.