Soltüstık Казахстан
Солтүстік өңірге газ тарту – өте өзекті мәселелердің бірі. Қазір шешу жолдары қарастырылып жатыр. Бұл жөнінде өңірге жұмыс сапарымен келген Энергетика вице-министрі Әлібек Жамауов С.Мұқанов атындағы облыстық ғылыми-әмбебап кітапханада өткен тұрғындармен кездесуде айтты.
Әлібек Жұмабекұлының мә- лімдеуінше, республикалық ведомство теріскей жақты «сұйық отынмен» қамтамасыз етудің оңтайлы жолдарын қарастырып жатқан көрінеді. Оның бір нұсқасы – Ресейден газ құбырын тарту тиімді болғанымен, баға жайы әлі келісілмеген.
«Солтүстік аймаққа табиғи газ тарту тақырыбы бірнеше жылдан бері жүйелі түрде талқыланып келеді. Билік өкілдері теріскейді газдандырудың екі нұсқасын ұсынған болатын. Біріншісі – «Сарыарқа» газ құбыры арқылы Орталық және Солтүстік өңірлерді газдандыру. 2019 жылы «Бейнеу – Бозой – Шымкент» газ құбырынан «сұйық отын» алатын «Сарыарқа» газ құбырының алғашқы кезеңі іске асырылды. 2022 жылы «АстанаГаз ҚМГ» АҚ құны 188,5 млрд. теңге болатын Ақмола және Солтүстік Қазақстан облыстарын газдандыруды көздейтін «Сарыарқа» газ құбырының екінші, үшінші кезеңінің құрылысы бойынша техникалық экономикалық негіздеме әзірледі. Қазір газ Астана қаласына дейін жеткен. Ал Солтүстікке дейін тарту үшін кем дегенде бес-алты жыл керек.
– Екінші нұсқа – Ресей Федерациясынан газ алу. Бір жылдан бері «Газпромм» мекемесімен баға бойынша келіссөздер жүргізіп жатырмыз. Егер бір мәмілеге келсек, Ресейден газды бірінші болып Солтүстік Қазақстан облысы қабылдайды. Көрші елдің Ишим қаласынан Петропавлға газ жеткізуге бір- екі жыл уақыт кетеді. Тездетіп газ әкелуге болар еді, бірақ ол қымбатқа түседі. Құбырлардың өткізу қабілетін қарастырсақ, Ресейден газ тарту тиімдірек, – деді вице-министр.
Газ өнеркәсібі департаменті- нің басшысы Бақытжан Таубаев бағаға келіссе, мәселе жан-жақты қарастырылатынын, екі жолдың бірі таңдап алынатынын жеткізді.
Энергетика министрінің орынбасары қойылған сұрақтарға жауап беріп, бір топ азаматты қабылдады.
Сапар барысында №2 Петропавл жылу электр орталығында болып, жылу беру жайымен танысты. Өңірде электр және жылу энергиясының жалғыз көзі осы кәсіпорын болып табылады. Оның электр қуаты – 391,8 мВт-ты, жылу қуаты 713 Гкал/сағатты құрайды. Физикалық тозуы 55,7 пайызға жеткен. Қазіргі уақытта мұнда 2,236 млрд. кВт.электр энергиясы өндіріліп, 1,675 млрд. кВт. электр энергиясы тұтынылған.
Энергетика министрінің орынбасары ұжыммен кездесуде сөйлеген сөзінде сұйытылған мұнай газымен және жанар-жағармаймен қамтамасыз етуде тапшылықтың байқалмайтынын, АИ-92 маркалы бензиннің 6,69 мың, (27 күнге жетеді), АИ- 95-тің 0,90 мың, (17 күнге жетеді), дизель отынының 6,17 мың тонна (9 күнге жетеді) қоры жасақталғанын, бұл мәселе министрліктің тұрақты бақылауында екенін жеткізді.
Станцияда биіктігі 180 метрге жететін жаңа мұржа салынып, келесі жылы пайдалануға беріледі. Қазандықтар жаңартылуда. Жұмысшылардың жалақысы 30 пайызға көбейген. Кадр тапшылығын азайтудың басқа да мүмкіндіктері қарастырылған.
Өмір ЕСҚАЛИ,
«Soltüstık Qazaqstan».