Soltüstık Казахстан
Петропавлда «Абай мен Пушкин» ескерткішінің үстіне шығып, суретке түскен шетелдіктер бес тәулікке қамалды.
Оқиға 1 қаңтар күні болған. Облыстық полиция департаменті баспасөз қызметінің мәліметінше, Тәуелсіздік стелласының маңындағы мұз қалашығында серуендеп жүрген қала тұрғындары жігіттердің өрескел әрекетін байқап қалған. Жастар «Абай мен Пушкин» ескерткішіне шығып, суретке түскен. Бейәдеп сөйлеп, қоғамдық тәртіпті бұзған.
Тұрғындар сол маңда кезекшілікте жүрген полицияның жаяу жасағына жүгініп, жедел басқару орталығындағы бейнебақылау инспекторларының көмегімен құқық бұзғандарды ұстады.
Шетелдіктерге қоғамдық орында мас жүргені үшін хаттама толтырылды, көрші елдердің бірінен Петропавлға келген жастардың үшеуінің де Қазақстан аумағында болу мерзімі аяқталғаны анықталды. Олар бұл заң бұзушылықтары үшін әкімшілік жауапкершілікке тартылды.
Ал Петропавлдың әкімшілік істер жөніндегі мамандандырылған соты ескерткіш үстінде селфиге түскен шетелдіктерді бес тәулікке әкімшілік қамауға алды.
Ақерке ДӘУРЕНБЕКҚЫЗЫ,
«Soltüstık Qazaqstan».