Жыл басынан бері тәртіп сақшылары тыныштықты бұзған 334 адамды жауапкершілікке тартып, айыппұл салды.
Пәтерлерді тәуліктеп жалға алушылар онда көңіл көтеріп, көрші пәтерлердегі жұмыстан шаршап келген, сырқаттанған егде жастағы адамдардың, нәрестелердің мазасын алатынын түсінбей жатады. Тұрғындар бұл жағдайға наразылықтарын әлеуметтік желілерде білдіруде. Осы орайда жағдайдан шығар жол – полицияға жүгіну.
Петропавл қаласының полицейлері жалға алушыларға тыныштықты бұзғаны үшін қолданылатын жауапкершілік туралы ескертуде. Бұл жөнінде пәтерді жалға беру шартында көрсетіледі, пәтерде ҚР Әкімшілік құқық бұзушылықтар туралы Кодексінің 437-бабының мәтіні орналастырылады. Баптың санкциясымен ескерту көзделмеген, тек жеке тұлғаларға 5 айлық есептік көрсеткіш көлемінде айыппұл салу қарастырылған.
Спирттік ішімдік ішіп, жұрттың мазасын алатындар жиі кездеседі. Қазіргі уақытта облыс орталығының 1175 тұрғыны «маскүнем» санаты бойынша есепте тұр. Петропавл қаласында 66 жанжал шығарушы есепке алынған. Олармен алдын алу жұмыстары жүргізілуде.