Бельгияның Брюссель қаласындағы Еурокомиссияның штаб-пәтерінде өткен баспасөз мәслихатында “The Event Horizon Telescope” жобасының мамандары адамзат тарихында алғаш рет Қара құрдымның (черная дыра) фотосуретін таныстырды.
Сәуірдің 10-ы күні жарияланған жаңалықтың адамзат баласы үшін ең құнды тұсы – Эйнштейннің жалпы салыстырмалық теориясын дәлелдеуге ықпал етуінде. Әрі тартылыс күші теориясын жетілдіруге де жол ашады. Әрине, жұртшылыққа таныстырылған фото біздің ұғымымыздағы сурет емес. Бұл радиотелескоптар арқылы жиналған деректер негізінде жасалған дүние. Өйткені, Жерден 500 квинтиллион шақырым немесе 53 млн. жарық жылындай алыста орналасқан Қара құрдымның стандартты фотосын түсіру мүмкін емес. Сондықтан, “The Event Horizon Telescope” командасы бірнеше телескопты пайдалануға бекінген.
Жобаның авторы Шеп Доулман бастамасымен бес құрлықтағы 8 телескоптың жұмысы атом сағаттарының көмегімен сәйкестендіріледі. Нәтижесінде “Messier 87″ галактикасындағы Қара құрдымды бақылайтын диаметрі 12 мың шақырымды құрайтын виртуалды телескоп пайда болады. Бұл телескоптардың әрқайсысы 500 террабайт ақпарат жинағандықтан, оны интернет арқылы обсерваторияларға жіберу мүмкін болмады. Сондықтан, деректер 1024 хард-дискге көшіріліп, АҚШ-тағы Хайстак обсерваториясы мен Германиядағы Макс Планк институтына жіберілді.