Elimizde “Rýhanı jańǵyrý” baǵdarlamasyn iske asyrý aıasynda 30 tamyzdan “Mýzeıler sherýi” atty jalpyrespýblıkalyq aksıa bastaý alǵan edi. Jýyrda osy aýqymdy shara Qyzyljardaǵy “Abylaı han rezıdensıasy” murajaı-kesheninde jalǵasty.
Bul aksıa ulttyq mádenı muralardyń turǵyndarǵa qoljetimdiligin qamtamasyz etýdi kózdeıdi. Ásirese, ol jastarǵa ulttyq tarıhtan tereń habar beredi. Sonymen birge mádenıet pen óner salasynda bolyp jatqan is-sharalarǵa jurtshylyqtyń nazaryn aýdaryp, “Rýhanı jańǵyrý” jáne “Uly dalanyń jeti qyry” baǵdarlamalary týraly birshama aqparat berýdi maqsat etken.
“Abylaı han rezıdensıasy” murajaı-kesheninde sherý aldymen ekskýrsıamen bastalyp, odan ári qaladaǵy Sábıt Muqanov atyndaǵy oblystyq qazaq sazdy-drama teatry ónerpazdarynyń qoılymymen jalǵasty. “Abylaı hannyń Reseı elshisimen kezdesýi” atty bul qoıylym tarıhı tulǵanyń ómiri men qaıratkerlerlik qyrlarynan syr shertti. Qazaq dalasyna entelep enip kele jatqan patshanyń óktemdik júrgizýin toqtatýdy oılaǵan hannyń ádis-aılasyn, amal-tásilderin akterler áserli jetkize bildi. Al “Ǵasyrlardan jetken tarıh” kvest oıyny boıynsha jınalǵan jastar Abylaı hanǵa tikeleı “suraqtar qoıý” múmkindigine ıe boldy. M.Qozybaev atyndaǵy SQÝ-diń stýdentteri bul oıynda erekshe belsendilik kórsetti. “Serpin” baǵdarlamasymen oqyp jatqan Raıymbek Babash, Nurdáýlet Tastan jáne t.b. ózderin tolǵandyrǵan máselelerge jaýap aldy. Sonymen birge belsendi qatysýshylarǵa syılyqtar berildi.
Jaqsybaı SAMRAT.