Ұжымдағы түрлі түйткілдерді шешу, полицейдің жаңа келбетін қалыптастыру – ішкі істер органдары қызметкерлерінің Ұлттық ұлан Әскери институтында өткен оқу-әдістемелік жиынында осы және басқа да өзекті мәселелер талқыланды. Жиынға облыстық полиция департаменті, қылмыстық-атқару жүйесі, төтенше жағдайлар, мамандандырылған күзет қызметі басқармасының бөлім басшылары мен олардың орынбасарлары, батальондар және взвод командирлері қатысты.
“Басшы өз қарамағындағы қызметкерлер үшін әдептіліктің жарқын үлгісі болуы, ұжымдағы жағдайға баға беріп, тез түзете білуі тиіс, тәлімгерлік институты әлеуетін сауатты пайдалана білгені жөн. Бүгінде полиция қатарында еңбек өтілі бір жылға толмаған қызметкерлермен 240 жуық тәлімгер жұмыс істейді. Жас мамандардың жетістігі көбінесе басшысының қабілетіне де байланысты”, – деді облыстық полиция департаменті бастығының орынбасары полиция полковнигі Қапез Дәулетбаев.
Мұндай жиындар мамандардың кәсіби деңгейін арттыруға септігін тигізеді. Жиын бағдарламасында дәрістермен қатар, тәжірибелік сабақтар да өткізілді. Жиынның тақырыбы да жан-жақты болды, атап айтқанда, отансүйгіштікке тәрбиелеу, нормативтік-құқықтық құжаттарды түсіндіру, заманауи жағдайда терроризм мен экстремизмге қарсы күрес бағытындағы жұмыс, сыбайлас жемқорлықтың алдын алу, сөз сөйлеу мәдениеті, отбасы құндылықтарын насихаттау және т.б.
Курс жетекшісі, Қазақстан Республикасы Ішкі істер министрлігі кадр саясаты департаментінің ғылыми қызметкері, отставкадағы полиция полковнигі Болат Каженов айтып өткеніндей, жиын 2019-2020 жылдары ішкі істер органдарын реформалау бойынша “Жол картасы” аясында өткізілуде.
Жиын соңында қатысушыларға сертификаттар табыс етіліп, тәрбие жұмысы жөніндегі әдістемелік құралдар үлестірілді.