Өңірімізде идеологиялық тұрғыдан ескірген, ауыстыруды қажет ететін 33 елді мекен, 300-ден астам көше мен 13 ауылдық округ атауы бар. Олардың қатарында Куйбышев, Киров, Ленин ауылдық округтері, Буденное, Чапаево, Красный Октябрь, Комсомолец сияқты елді мекендер, сондай-ақ Ленин, Комсомол, Карл Маркс, Совхозный, Советский, Октябрьская, Калинин, Пионерская, Коммунистическая, Комсомольская, Киров, Куйбышев секілді көше атаулары кездеседі, – деп хабарлады облыстық мәдениет, тілдерді дамыту және архив ісі басқармасы.
Новодворовка, Дашка-Николаевка, Бахмут, Чермошнянка, Черниговское, Кременчуг, Келлеровка, Обуховка, Иван-Город, Белоярка, Большой Изюм, Разгульное, Ялты, Симоновка, Князевка, Рухловка, Тахтаброд, Сазоновка сынды атаулар осы санатқа жатады.
Облыстық мәдениет, тілдерді дамыту және архив ісі басқармасының басшысы Досбол Әбдірейісовтің айтуынша, өңір тарихымен үш қайнаса да сорпасы қосылмайтын көше, елді мекен атауларын өзгерту бағытында жүйелі жұмыс жүргізілуде.
«Мемлекет басшысының Ұлттық құрылтай отырыстарында берген тапсырмасына сәйкес облыста ономастика саласын жүйелеу бағытында кешенді әрі жоспарлы жұмыс атқарылып келеді. 2022 жылдан бері «Жеріңнің аты – еліңнің хаты» атты іс-шаралар кешені қолға алынған. Аталған жоба аясында облыстың барлық ауданында және Петропавл қаласында «Ономастикалық кеңістікті реттеу жолдары» тақырыбында жыл сайын кездесулер өткізіліп тұрады. Бұл жұмысқа елге танымал қоғам және мемлекет қайраткерлерін тартуды дәстүрге айналдырғанбыз», – деді басқарма басшысы.
2020-2025 жылдар аралығында облыста 3 ауылдық округ пен 6 елді мекеннің атауы өзгертілген. Атап айтқанда, Кривощеков ауылдық округі – Арай, Ленин ауылдық округі – Бике, Новосел ауылдық округі – Үлкен Қараой деп қайта аталды. Кривощеков, Воскресеновка, Карасевка, Ленин, Киевское, Коммунизм ауылдарына тарихи әрі ұлттық мазмұндағы жаңа атаулар берілген. Осы кезеңде өңір бойынша 281 көше атауы жаңартылыпты.
«Қазіргі уақытта облыстағы атауы жоқ көшелерге атау беру жұмысы жалғасып жатыр. Бұл «Жедел жәрдем», өрт сөндіру, полиция секілді жедел қызметтердің жұмысын жеңілдету үшін аса маңызды. 2025 жылға арналған Жол картасы аясында Мағжан Жұмабаев ауданындағы 15 көшеге атау беру мәселесі облыстық ономастика комиссиясында оң шешімін тапты. Қазіргі уақытта ауылдық округ әкімдері заңнамаға сәйкес құжаттарды рәсімдеу жұмыстарын жүргізіп жатыр», – деді Досбол Әбдірейісов.
Былтыр Жеңістің 80 жылдығына орай Қызылжар ауданындағы бір көшеге Талғат Бигелдиновтің, ал Уәлиханов ауданындағы екі көшеге Мәншүк Мәметова мен Әлия Молдағұлованың есімін беру жөнінде шешім қабылданған. Сонымен қатар Петропавлдағы «Бірлік» және «Орман» шағынаудандарындағы атауы жоқ көшелерге атау беру мәселелері қоғамдық тыңдауларда қаралып, тұрғындар тарапынан қолдау тапты.
Ақерке ДӘУРЕНБЕКҚЫЗЫ,
«Soltüstık Qazaqstan».