Сәбит Мұқанов атындағы облыстық қазақ сазды-драма театрында қазақ даласындағы ең мұңды да мәңгілік махаббат хикаяларының бірі – Естай мен Қорлан тағдырына арналған «Махаббат әні» пластикалық спектаклінің премьерасы өтті. Қос ғашықтың қосыла алмаған жүрек сырын сахна тілімен жеткізген шығармашылық ұжым көрерменнің ыстық ықыласына бөленді.
Спектакльде сөзден гөрі қимыл, пластика, би мен музыкаға басымдық берілген. «Шабыт» би ансамблі мен жас әртістердің сахнадағы әрбір қозғалысы махаббат, арман, өкініш пен тағдыр қақтығысын көркем бейнеледі. Жарық, дыбыс, сахнаның қойылым мағынасына сай көркем безендірілуі жоғары деңгейде ұйымдастырылып, көрерменді бір сәтке өткен ғасырдағы қазақ ауылының тыныс-тіршілігіне жетелеп әкетті.
Қойылым желісі бойынша Ертіс өңіріндегі Ақкөл ауылынан елу шақырым жерде Сүлеймен атты бай өмір сүреді. Оның ұлы Шошанның қалыңдығы – Маралды деп аталатын ауылдың қызы. Сүйіктісін көруге аттанған Шошан өзімен бірге досы әрі ел арасында құрметті әнші атанған Естайды ертіп апарады. Торқалы той-думан кезінде Естай сұлу Қорланмен танысып, екеуінің арасында сезім оты тұтанады. Алайда Қорлан атастырылған қыз еді. Соған қарамастан қос жүрек бірін-бірі сүйетінін мойындайды. Екі жастың жүрегі бір болса да тағдырдың жазғаны басқа болып шықты. Қыздың әкесі салт-дәстүрді алға тартып, Қорланды атастырылған жігітке ұзатады. Театр актерлері Қорланның басына ақ орамал салынған сәттегі көз жасы мен Естайдың ішкі күйзелісін ерекше әсерлі жеткізді. Залдың әр тұсынан көз жасына ерік берген көрерменді көрдік. Ақыры екі жас амалсыздан екі жаққа кетеді. Ал Естай өмір бойы Қорланды ұмыта алмай, өзінің мәңгілік сағынышын «Қорлан» әні арқылы халқына аманат етеді.
«Қойылымда актерлердің дауыс тембрі, эмоция, сахналық мәдениеті жоғары деңгейде көрінді. Олардың ұлттық нақыштағы киімдері өте сәнді тігілген. Қыздардың оюлы көйлектері, қос бұрым етіп өрілген шаштарына қарап құдды бір өткен ғасырларда жүргендей әсерге бөлендім. Мұның бәрі – сахнаның эстетикалық бейнесін толықтырған элементтер. Спектакль сонысымен де құнды», – дейді көрермендердің бірі Аружан Еркімбай.
«Махаббат әні» пластикалық спектаклінің режиссер-хореографы – Нұрай Мұхамеджан. Ал Қорлан рөлін актриса Жұлдыз Тынысбек сомдады. Оның сахнадағы нәзік те мұңлы бейнесі көрерменнің жүрегіне жол тапты. Жұлдыз театрда екі жылдан бері еңбек етіп келеді және бұған дейін де бірқатар қойылымдарда басты рөлдерді ойнаған. «Сыған серенадасындағы» Сағыныштың бейнесі – актрисаның ең сүйікті образдарының бірі.
Бұл спектакль – тек махаббат туралы қойылым ғана емес, қазақтың салт-дәстүрі, тағдырға илану, қоғамдағы күрес жайлы терең ой салатын көркем дүние. Естай мен Қорланның сағынышқа толы хикаясы сахнада жаңаша үн қатып, көрерменді бейжай қалдырмады.
Данагүл ҮРТЕМІШ,
М.Қозыбаев атындағы СҚУ-дың студенті.
Суретті түсірген
Шыңғысхан БЕКМҰРАТ.