Óńirimizde Jeńistiń 75 jyldyǵyna oraı uıymdastyrylǵan is-sharalar legi Nazarbaev zıatkerlik mektebinde “Myń alǵys sizge, ardager!” taqyrybyndaǵy sýret salý baıqaýymen jalǵasty.
Baıqaý jas erekshelikterine baılanysty eki topta ótti. Qolyna qylqalam ustaǵan talantty órenderdiń jumysy jeke-jeke baǵalandy. Qazylar alqasy úzdik kartınany tańdaý kezinde qatysýshylardyń sýretti salý tehnıkasyna, kórkemdigine basa nazar aýdardy.
Uly Jeńisti, qıyn-qystaý soǵys jyldaryn, maıdangerlerimiz ben olardyń erligin qylqalamnyń kómegimen qaǵaz betine túsirýge nıet tanytqan oqýshylar sany kóp boldy. Sonyń ishinde erekshe kózge túsip, qazylar alqasyna unaǵan alty týyndy iriktelip alynyp, avtorlary maqtaý qaǵazymen jáne estelik syılyqtarmen marapattaldy. 7 “D” synybynda oqıtyn Dıara Aǵzamovanyń sýreti úzdik dep tanylyp, ol birinshi oryndy jeńip aldy. Ekinshi oryn 7 “V” synybyndaǵy Mahabbat Toqtarǵa buıyrsa, 7 “F” synybynyń oqýshysy Anastasıa Vızıgınanyń sýreti úshinshi orynǵa laıyq dep tanyldy.