Elbasy Nursultan Nazarbaevtyń “Bolashaqqa baǵdar: rýhanı jańǵyrý” baǵdarlamasyndaǵy “Týǵan jer” jobasyna Esil aýdanynyń kásipkerleri belsene qatysýda. Jomart jandar aýdandyq kitaphanaǵa qomaqty qarajat bólip, balalarǵa arnalǵan ádebıet qorynyń jańa týyndylarmen tolyǵýyna óz úlesterin qosýda.
Jyl saıyn memlekettik qarjy kózderi arqyly jańa kitaptarǵa tapsyrys beremiz. Alaıda, sońǵy ýaqytta qarajattyń azdyǵynan balalarǵa arnalǵan ádebıetter azaıyp qaldy. Jergilikti kásipkerler bizge kómekke kelip, aýdanymyzdyń kishkentaı turǵyndary úshin 70-ge jýyq kitap satyp alyp berdi. Máselen, “Prometeı-Agro” JSHS-niń dırektory Iýrı Shól men “Zagradovskoe” JSHS-niń dırektory Ivan Fısenko Zagradovka aýyldyq kitaphanasynyń qoryn jańartty. Sondaı-aq, “Astyq Bulaq” jáne “Ǵaısa” JSHS-niń dırektorlary Saılaý Sultanǵalıev pen Birjan Ǵaısın syndy qaıyrymdy jandardyń arqasynda Bulaq jáne Qaraǵash aýyldyq kitaphanalarynyń kitap qory álem klasıkteriniń týyndylarymen tolyqty. Balalar men jasóspirimderge arnalǵan qyzyqty da tanymdyq ádebıetterdiń ishinde qıalǵajaıyp ertegiler, jańyltpashtar men balalardyń oı-órisin damytatyn tapsyrmalar jıyntyǵy da bar. Sonymen qatar atalmysh aýyldyq kitaphanalarǵa balalarǵa arnalǵan tanymdyq ústel oıyndary, ártúrli taqyryptaǵy qurastyrǵysh zattar da syıǵa tartyldy.
Jas urpaqtyń boıynda Otanǵa degen súıispenshilikti qalyptastyrýda kitaptyń alar orny zor. Mesenattardyń kómegimen kitaphanalarymyz patrıottyq taqyryptaǵy ádebıettermen de tolyǵýda. Týǵan jer, Otan taqyrybynda jazylǵan jaýqazyn jyrlar toptamasy aýyl kitaphanalaryna jóneltildi.
Máýıa AHMETJANOVA,
Esil aýdanynyń ortalyqtandyrylǵan
kitaphana júıesiniń dırektory.