Облыстық «Soltüstık Qazaqstan» газетінің 105 жылдығы мен 2026 жылға баспасөзге жазылу науқанына орай ұйымдастырылған «Газетке жазылып, iPhone ұтып ал!» акциясы өз мәресіне жетті. Шартқа сай газетке жазылған оқырман ұтысқа қатысуға мүмкіндік алды. Су жаңа «iPhone» иегері 31 желтоқсан күні тікелей эфирде анықталды. Жазушы, журналист Жарасбай Сүлейменов жеңімпаздың есімін лототрон арқылы анықтады.
Бәріміздің көкейімізде сыйлықты газеттің шын жанашыры, адал оқырманы иеленсе екен деген тілек болғаны рас. Ұтыс нәтижесінде редакция сыйлығы Шал ақын ауданының тұрғыны Жанна Жанғаринаға бұйырды. Жанашыр оқырманымызға заманауи смартфонды басылым басшысы Ербақыт Амантайұлы табыстады.
«Ризашылық сезімімді сөзбен айтып жеткізу мүмкін емес. «iPhone» ұтып алдыңыз деген хабарлама келгенде өз көзіме өзім сенбедім. Жүздеген адамның ішінен менің бағым жанады деп ойламаппын. Газетті Водопроводный ауылында тұратын ата-анама жаздыртқанмын. Әкемнің жасы сексенге жақындаса да мерзімді баспасөзден қол үзген емес. Редакция ұжымына мың да бір алғыс айтамын», – деді Жанна Жанғарина.
Диас АЯҒАН,
«Soltüstık Qazaqstan».