ЫНТЫМАҚТЫ ЕЛДІҢ ЫРЫСЫ МОЛ
Көпұлтты Қазақстан мемлекетіндегі түркітілдес ағайындарымыздың әрқайсысы Наурыз мейрамын өз салт-дәстүрлеріне сүйене отырып қарсы алады.
Бұл мерекенің біздің халқымыз үшін орны ерекше. Наурыз – жыл басы. Сондықтан ең әуелі дастарқанның мол болуына баса назар аударамыз. Ал ол дастарқанымыздың сәнін келтіретін негізгі тағам – “ашура” деп аталады. Бұл тойымды, тәтті әрі пайдалы асты басқа күндері де әзірлейміз, дегенмен Наурыз мейрамы қарсаңында оны қыз-келіншектер ерекше дәмді қылып жасауға тырысады. Жалпы біз бұл мерекеге дайындықты бір апта бұрын бастаймыз. Яғни, көктемнің алғашқы күндерінде үйді тазартып, мүмкіндігінше жаңа жиһаздар алып, барлығын жаңартуға тырысамыз. Сондай-ақ, салт-дәстүрге сай бұл күні біз от жағып, оның үстінен жеті рет секіруіміз керек. Негізінде аталған рәсім жыл өткен сайын ұмытыла бастауда. Дегенмен, көпшілік бұл дәстүр адамға жетістік әкеледі деп сенеді. Осылай 22 наурызды той-думанмен берекелі дастарқан басында өткізгеннен кейін, 23-і күні таза киімдерімізді киіп, мәңгілік сапарға аттанған туыстарымыз бен жақындарымыздың басына барып, Құран бағыштаймыз.
Бір шаңырақтың астында татулық пен бірлікте өмір сүріп жатқан барша қазақстандықтар мен өзге этнос өкілдерін жыл басы – Наурыз мейрамымен құттықтаймын! Жаңарту мен жасампаздықтың бастауы, ырыс пен ынтымақтың арқауы болған әз-Наурыз қажырлы еңбектеріңізге толағай табыстар әкелсін!
Диляра ХАСАНОВА,
“Түрік мәдениеті” қоғамдық бірлестігі төрағасының орынбасары.
ТІРШІЛІК ЖАҢАРАТЫН КҮН
Ақтың молаятын, нұрдың молығатын, тіршіліктің жаңаратын, өмірдің жаңғыратын, пейілдің түзелетін, көңілдің кеңитін кезеңі – Наурыз мейрамы қазақ халқы үшін де басты мерекелердің бірі екенін жақсы білеміз. Өкінішке қарай, елдегі төтенше жағдайға байланысты биыл бұл күнді жылдағыдай әр ұжымда, білім ордаларында, әр аулада тойлауға мүмкіндік жоқ. Дегенмен, адамдар бұл күнді елеусіз қалдырмай, отбасымен ұлттық тағамдар дайындап, мол дастарқан жайып, қарсы алуы тиіс деп ойлаймын.
Әзірбайжандар – өзінің ұлттық салт-дәстүріне жоғары құрметпен қарап, оларды атаусыз қалдырмайтын халықтың бірі. Наурыз мерекесі бізде “Новруз-байрам” деп аталады.
Шаңырағының астына отызға жуық этномәдени бірлестікті топтастырып отырған облыстық ассамблея да бұл мейрамды атап өтуге айрықша мән береді.
Ұлы күннің Әзірбайжанда қалай тойланатынына да тоқталып өтсем деймін. Наурыз мерекесіне дайындық ерте басталады. Үй аулалары тазаланып, ағаш отырғызылады, жаңа киім тігіледі, жұмыртқалар боялады, тәтті-дәмділер мен ұлттық тағамдар дайындалады. Әрбір шаңырақ өз дастарқанына бидай тұқымынан өсірілген жасыл өскіндер қояды. Басқа да көптеген халықтардағы секілді, Әзірбайжанда Наурыз отбасылық мейрам болып есептеледі. Жаңа жыл молшылық әкелсін деген ниетпен үстелге көптеген әртүрлі тағамдар қойылады. Мейрам үш күн тойланады және көпшіліктің серуенімен аяқталады. Адамдар ұлттық киімдерді киіп, халық әндері мен билерін орындайды, спорт түрлері бойынша жарыстар өткізіледі.
Чингиз КУРБАНОВ,
Әзірбайжан қоғамдық мәдени бірлестігінің төрағасы.