Көңіл толқыны
Қауырсын қанат балғын шәкірттердің хаттарын редакцияға Бибігүл Шамилова жолдапты. Психолог мұғалімнің айтуына қарағанда, Благовещенка қазақ мектебінде оқитын 271 балаға 44 мұғалім сапалы білім, саналы тәрбие берумен айналысады. Жібек Мырзатаева жетекшілік ететін ұжым – мақтаулылар санатында. Біз мектеп бітіргелі отырған жеткіншектердің ұстаздары жайлы жүрекжарды толғаныстарын, ыстық лебіздерін қаз-қалпында беруді жөн көрдік.
“Менім сүйікті ұстаздарым көп. Солардың бірі – Арай Жамбылқызы. Апай 10-сыныпта Қазақстан тарихы, дүниежүзі тарихы пәндері бойынша сабақ берді. Бізге ешқашан дауыс көтеріп, ұрысқан емес. Сабақтан тыс кездерде де бізбен көбірек болуға тырысады. Ұлағатты ұстаз деген атқа әбден лайық.
Өкініштісі сол, апайымыз жұмыс бабымен басқа жаққа көшіп кетті. Жанарымыз жасқа толып, кеудемізді ащы өксік қысты. Ең қиыны, қимайтын адаммен қоштасу екен”.
Гүлзат ҚҰСАЙЫНОВА.
Қоштасатын күн жақын
“Ұстаз” деген сөздің астарында терең мән-мағына жатқанын есейе келе білдік. Білім, ғылым, махаббат пен сүйіспеншілік, мейірімділік пен бауырмалдылық, талапшылдық пен турашылдық – бәрі аяулы мектеп қабырғасында қаланып, сүйікті ұстаз-бағбандарымыз ала жаздай жер тырмалап, дән сепкен диқан қауымына ұқсап бір тынбай еңбектенеді. Соңғы сыныпта оқып жүргендіктен бе, қатты бауыр басып қалғанымды енді аңғардым. Соңғы қоңырау үні жақындап, мектеппен, ұстаздарыммен қимас қоштасуды ойласам, жүрегім сыздайды. Жақсы адамдардан білім-тәрбие алғанымды мақтан етемін.
Айдана ҒАЛЕЛ.
Екінші ата-анам
“Мұғалім екінші ата-анаң іспеттес. Ол – мектеп атты қасиетті мекенде қамқор болып, бар білгенін бізге үйрете білетін мейірімді жандар.
Менің алғашқы ұстазым – Меруерт Әбілова тәтей. Бірінші сыныптан үшінші сыныпқа дейін Киров ауылындағы мектепте оқыдым. Осы аз уақыт ішінде мені көп нәрсеге үйретті. Осы кісінің арқасында сауат ашып, хат таныдым. Жас ұрпақты – Қазақстанның болашақ иелерін білім мен ғылымға үйретуден еш жалықпайтын ұстаздар қауымына басымды иемін!”.
Сабина ЕСЛӘМБЕК.