Uly Abaıdyń 175 jyldyǵyna oraı Aqjar aýdanynyń Górkı orta mektebinde kitaphanashylar arasynda “Men Abaıdy oqımyn” baıqaýy ótkizildi. Qazaq jazba ádebıetiniń negizin qalaýshy Abaı Qunanbaıulynyń murasyn nasıhattaý maqsatynda uıymdastyrylǵan saıys eki kezeńnen turdy.
Alǵashqysynda baıqaý qatysýshylary aqynnyń óleńderin jatqa aıtty. Qazylar alqasy kitaphanashylardyń týyndylardy mánerlep oqý qabiletine, akterlik sheberligine mán berdi. Ekinshi kezeńde kesh júrgizýshileri – aýdandyq bilim bóliminiń ádiskeri Sulýshash Muqanova men Górkı orta mektebiniń kitaphanashysy Anna Gerlıs úmitkerlerge aqyn shyǵarmashylyǵyna qatysty túrli suraqtar qoıdy. Uly Abaıdyń qarasózderiniń maǵynasyn jarysa jetkizgen saıyskerler baıqaý barysynda án shyrqap, óz ónerlerin ortaǵa saldy.
Barlyq kezeń boıynsha úzdik dep tanylǵan Dáýit jáne Kıev orta mektepteriniń kitaphanashylary A.Berdiǵulova men A.Mýttakıeva birinshi oryndy ıelendi. Lenıngrad №2 orta mektebiniń kitaphanashysy M.Salyqova, Besterek orta mektebiniń kitaphanashysy S.Qojaǵulova – ekinshi, Aqsarydan J.Seıdalıeva men Keńashydan G.Ámirenova úshinshi oryndardan kórindi. Baıqaý jeńimpazdary dıplomdarmen marapattalyp, arnaıy syılyqtarǵa ıe boldy.
Shara barysynda “Abaı – dana, Abaı – dara” taqyrybynda kitap kórmesi uıymdastyryldy. Kesh sońynda kórermender baıqaý qatysýshylarymen birge Abaıdyń “Kózimniń qarasy” jáne “Jelsiz túnde jaryq aı” ánderin qosyla shyrqady.
Aıgúl BERDİǴULOVA,
Dáýit orta mektebiniń kitaphanashysy.
Aqjar aýdany.