Qazaqstan halqynyń birligi kúnine oraı “Birligimiz jarasqan!” atty vokaldyq baıqaý ótti. Otbasylyq ujymdardyń, jeke oryndaýshylardyń shyǵarmashylyǵyn damytý jáne rýhanı qundylyqtardy nasıhattaý maqsatynda qashyqtan uıymdastyrylǵan sharaǵa etnomádenı birlestikterdiń ókilderinen quralǵan 14 ónerpaz baq synady.
Sáýir aıynyń ortasynda jarıa-lanyp, eki aptaǵa sozylǵan baıqaý barysynda patrıottyq, dostyq jáne mahabbat taqyrybyndaǵy avtorlyq ánder oryndaldy. Qatysýshylardyń ónerin kásibı ánshiler men mýzykalyq mekemelerdiń qyzmetkerleri baǵalady.
Nátıjesinde qazylar alqasynyń sheshimimen Qyzyljar aýdanynyń “Kali laska” etnomádenı ortalyǵynyń ókilderi – Gorodeskıler áýleti birinshi orynǵa laıyq dep tanyldy. Ekinshi oryndy “Sibir kazaktary baýyrlastyǵy” qoǵamdyq birlestiginiń ókilderi Blambaevtar otbasylyq dýeti men “Dýslyk” tatar-bashqurt qoǵamdyq birlestiginiń atynan qatysqan aǵaıyndy Sısanbaevtar ózara bólisti. Al úshinshi oryn úsh birdeı qatysýshy – “Qazaqstannyń orys qaýymy” respýblıkalyq qoǵamdyq birlestigi oblystyq fılıalynyń belsendisi Anton Gýtorovqa, “Dýslyk” tatar-bashqurt qoǵamdyq birlestiginiń ókili Adıl Nýrıahmetovke, “Svitanok” ýkraın mádenıeti ortalyǵynyń múshesi Irına Markınaǵa buıyrdy.
Sonymen qatar qazylar alqasy eki jas qatysýshy – Kamıla Shamshýtdınova men Angelına Arakelovanyń ónerin joǵary baǵalap, olar Qazaqstan halqy oblystyq asambleıasynyń yntalandyrý syılyǵyna ıe boldy.