“COVID-19” indetiniń aldyn alý úshin karantın jarıalanyp, qalaǵa kirip-shyǵýǵa tyıym salyndy. Sol sebepti atamekende bilim nárimen sýsyndaý maqsatymen kelgen qandastarymyz úılerine kete almaı qaldy. Karantın bastalǵaly Mońǵolıa, Qytaı, Ózbekstan, Reseı memleketterinen kelgen 50 stýdent ýnversıtettiń №3 jataqhanasynan alysqa shyǵa almaýda. Sabaqtaryn qashyqtan oqıdy.
Ata-analarynan alysta júrgen jastardyń turmys-tirshiligine, kúndelikti ishipjeıtin as-aýqattaryna kómektesip, qamqorlyq tanytyp jatqan azamattarymyz barshylyq. Atap aıtatyn bolsaq, “Dúnıejúzi qazaqtary qaýymdastyǵynyń” oblystyq fılıaly men “Otandastar qorynyń” janynan qurylǵan qandastardy aqparattyq qoldaý ortalyǵynyń front-keńsesi birinshi bolyp kómekke keldi. Qaýymdastyq fılıalynyń basshysy Arman Súıindikovtiń uıymdastyrýymen Búrkit Jumabaev, Erlan Sultanbekov, Aqedil Jýanyshpaev sıaqty kásipkerler qoldaý kórsetti.
– Osyndaı qysyltaıań shaqta shetelden kelgen stýdentterge qol ushyn sozyp, azyqtúlikpen qamtamasyz etip jatqan kásipkerlerge jáne “Otandastar qory” men “Dúnıejúzi qazaqtarynyń qaýymdastyǵyna” aıtar alǵysymyz sheksiz, – deıdi Mońǵolıadan kelip oqyp júrgen 1-kýrs stýdenti Aısulý Qanat.
Jazıra KÓKBASQYZY.