«QYZYLJAR» футбол клубы елімізде алғашқылардың бірі болып жеке қаржыландыруға көшті. Спорттық брендті, инфрақұрылымды және клубтың активтерін жекеге беру туралы келісімге қол қойылды.
Құжат «QYZYLJAR» футбол командасының Қазақстан футбол федерациясының, FIFA және UEFA-ның қолдауымен өтетін жарыстарға қатысуына байланысты құқықтары мен міндеттерінің жекеге өткенін білдіреді.
Мемлекет басшысы Қасым-Жомарт Тоқаевтың кәсіби футбол клубтарын жекешелендіру жөніндегі тапсырмасын іске асыру шеңберінде енді «QYZYLJAR» футбол клубының инвесторы кәсіпкер Сергей Кан болады. Тараптар барлық жарыстарға қатысу құқығын берумен қатар, клуб атауын сақтау туралы уағдаластықтарға қол жеткізді. Сондай-ақ Петропавл тұрғындарының сүйікті футбол командасы бұрынғыдай қызыл-қара түсті жейдемен ойнайтын болады.
Клубтың бұрынғы құқық иесі Қазақстан футбол федерациясы, FIFA, UEFA және CAS заңды (сот) органдарында қаралатын істерге, сондай-ақ құқықтар мен міндеттер берілгенге дейін туындаған істер бойынша жағымсыз салдардың туындауын болдырмауға міндеттенеді. Ал мұндай даулар туындаған жағдайда алдынғы құқық иесі оларды өз күшімен шешуі тиіс.
Клубты Солтүстік Қазақстан облысының әкімдігімен бірлесіп қаржыландыру туралы уағдаластыққа қол жеткізілді. Сондай-ақ команданың негізгі құрамы тұратын үй және жаңа спорттық база салу жоспарлануда. Бұл жобаны іске асыру клубтың материалдық-техникалық базасын нығайтуға мүмкіндік береді.
Сонымен қатар «Қарасай» стадионы клубтың сенімгерлік басқаруына беріледі. Қазіргі уақытта уәкілетті органдармен келіссөздер және келісу рәсімдері жүргізілуде. Стадионды клубтың басқаруына беру инфрақұрылымды тиімді пайдалануға, оқу-жаттығу жиындары мен матчтарды өткізу үшін жағдай жасауға, сондай-ақ өңірде басқа да іс-шараларды ұйымдастыру деңгейін арттыруға мүмкіндік береді.
«QYZYLJAR» футбол командасының бас менеджері болып Әлішер Апсалямов тағайындалды. Ол – бұған дейін «Sarajevo» (Босния және Герцеговина), «Cardiff City» (Уэльс), «Қайрат» (Алматы), «Каспий» (Ақтау), «Атырау» (Атырау), «Тобыл» (Қостанай) футбол клубтарында еңбек еткен тәжірибелі маман.
«QYZYLJAR» футболшылары жақында Түркиядағы оқу-жаттығу жиындарына аттанады, бір жарым ай ішінде алдағы маусымда ойнайтын команданың құрамы айқындалады. Клуб менеджменті қазақстандық және халықаралық нарықты зерделей отырып, футболшыларды мұқият іріктейтін болады», – деп атап өтті Әлішер Апсалямов.
Команда жаңа маусымды жаңартылған форматта – жеке отандық инвестормен, күшейтілген құраммен және футболды дамытуға деген заманауи көзқараспен бастайды.
Әнуарбек АМАНОВ,
«QYZYLJAR» футбол
клубының баспасөз хатшысы.