«Soltüstık Qazaqstan»

PDF

«SERPIN WAY» АВТОБУСЫ САПАРҒА ШЫҚТЫ

М.Қозыбаев атындағы Солтүстік Қазақстан университетінің кәсіптік бағдар беру тобы «Serpin Way» автобусымен алғаш рет елдің оңтүстік өңіріне сапарға шықты. Үш апта ішінде 6500 шақырымнан аса жол жүріп, 30-ға жуық елді мекенді, ірі қалалар мен ауылдарды аралайды.

– Биыл «Серпін» бағдарламасы аясында өңірге 200-ге жуық квота бөлінбек. Бұл сапарда университет өкілдері талапкерлерге жоғары оқу орнына түсу жолдары, қолжетімді гранттар, 160-тан астам білім беру бағдарламасы, Аризона университетімен ынтымақтастық және «Серпін» бағдарламасы аясында көрсетілетін қолдау жөнінде жан-жақты мәлімет беретін болады, – дейді М.Қозыбаев атындағы СҚУ-дың әлеуметтік- мәдени даму жөніндегі басқарма мүшесі Әділхан Төлепберген.

Делегация құрамында оқытушылар мен студенттер ғана емес, сонымен қатар Петропавл қаласындағы Мансап орталығының қызметкерлері де бар. Олар сапар кезінде оңтүстік өңірлердің тұрғындарына «Еңбек» бағдарламасының шарттарын түсіндіреді.

Қазіргі таңда М.Қозыбаев университетінде «Серпін» бағдарламасы бойынша 167 студент білім алып жатыр, олардың 65-і биыл жоғары оқу орнын тамамдайды. Түлектерді жұмысқа орналастыру үшін дуальды оқыту ұйымдастырылып, өңірдің ірі жұмыс берушілерімен 300- ден астам келісімшарт жасалған.

«Серпін» бағдарламасы бойынша оқуға түсетін талапкерлерге психологиялық қолдау көрсетіліп, жатақханамен қамтамасыз етіледі. Сонымен қатар 2-3 курсқа өткеннен кейін жұмысқа орналасуға мүмкіндік беріледі.

Гүлфайруз ТӨРЕМҰРАТОВА,

«Soltüstık Qazaqstan».

Әлеуметтік желілерде бөлісіңіз:

Share on facebook
Facebook
Share on telegram
Telegram
Share on whatsapp
WhatsApp