“Abylaı han rezıdensıasy” murajaı-kesheni áleýmettik jeliler arqyly onlaın sharalar ótkize bastady. Osy joly oblys turǵyndary “Abylaı hannyń XVIII ǵasyrdaǵy ishki jáne syrtqy saıasaty” taqyrybynda dáris tyńdap, Reseı jáne Qytaı elimen júrgizgen dıplomatıalyq qarym-qatynasy jaıynda bildi.
Sharany júrgizgen murajaı-keshenniń ǵylymı-zertteý bóliminiń basshysy Baýyrjan Júnisov eń aldymen Abylaıdy kóregen saıası qaıratker retinde tanytýǵa tyrysty. Máselen, tarıhshy óz leksıasynda hannyń soǵystardan qaljyraǵan eliniń esin jıǵyzý úshin dıplomatıalyq joldardy tıimdi paıdalanǵanyn keńirek áńgimeledi. Abylaı ózi bılik júrgizgen kezde qazaq halqynyń jerine jan-jaqtan qyzyǵa qaraǵan jaýǵa toıtarys berý maqsatynda Qytaı ımperıasymen de baılanysyn úzbedi. Osy oraıda Abylaı han birneshe ret Peterbýrg pen Pekınge elshilerin attandyryp, Reseı men Qytaı memleketteriniń ózara qaıshylyqtaryn qazaq handyǵynyń múddesine paıdalanyp otyrady. “Uly saıasatker retinde tanylǵan Abylaı qazaq eliniń táýelsizdigine nuqsan keltiretin jaǵdaılarmen aıanbaı kúresip, derbes saıasat ustandy. Tegeýrindi áskerı qımylmen qatar júrgizilgen dıplomatıalyq áreketteri Abylaıdy óz zamanynyń uly qaıratkeri deńgeıine kóterdi. Mysaly, Qytaı áskerleri jońǵarlardy joıyp, Orta Azıa men Qazaqstanǵa ene bastaǵan kezde musylman elderiniń basyn qosýǵa umtylyp, aýǵan shahy Ahmad Dýranımen kelissóz júrgizdi”, – dedi Baýyrjan Nábıuly taqyryptyq ekskýrsıa barysynda.
Búginde murajaı-keshende Abylaı hannyń ómiri jáne qyzmeti jaıly sırek kezdesetin ádebıetter, qujattar men sol zamanǵa tıesili kıim-keshek, qarý-jaraq saqtalǵan. Murajaı-keshen dırektorynyń orynbasary Ásemgúl Qydybekovanyń aıtýynsha, uly saıasatkerdiń ómiri men áskerı joryqtaryna arnalǵan ekskýrsıa ózge de sharalarmen jalǵasyn tappaq. Aldaǵy aptada murajaı qyzmetkerleri kıeli jerler kartasyna engen jádigerler men tarıhı oryndar jáne óńirimizden shyqqan batyrlar týraly onlaın dárister men sabaqtar ótkizýdi josparlap otyr. Sondaı-aq, murajaıdyń áleýmettik jelilerinde ınternet paıdalanýshylary úshin salt-dástúr taqyrybynda qyzyqty onlaın sharalar ótkizilmek.