Oblys ortalyǵyndaǵy “Balarman” balabaqshasynda “Árbir bala bir juldyz” aýqymdy bilim berý jobasy aıasynda túrli sharalar qolǵa alynǵan. Máselen, balabaqsha dırektory Baldyrǵan İlıasovtiń “Týǵan jerim – altyn besigim” atty avtorlyq jobasy sátti júzege asyrylýda. Búldirshinderdiń boıyna qorshaǵan ortany súıýdi, janashyrlyqty, tózimdilikti, ımandylyqty, ádeptilikti, meıirimdilikti, adaldyqty jáne basqa da asyl qasıetterdi qalyptastyrýdy maqsat etken joba aıasynda ata-analarmen birlese otyryp, aýqymdy konferensıa ótkizý dástúrge aınaldy. Sondaı-aq, aptalyqtar, erteńgilikter men ashyq sabaqtar, semınar-keńester júıeli túrde uıymdastyrylyp turady. Osynyń arqasynda “Balarman” balabaqshasynda tárbıelenip jatqan 170-ten astam búldirshinge sapaly bilim berip qana qoımaı, óz tájirıbemizdi ózgelermen bólisemiz.
Árbir búldirshinge sapaly bilim men ónegeli tárbıe berýdi mindeti sanaıtyn balabaqsha ujymynyń jańa pedagogıkalyq ádisterdi meńgerýge degen talpynystary joǵary. Osynyń nátıjesinde qyzmetkerler kásibı qabiletterin jetildirip, oqýtárbıe úderisin jańashyldyqpen júrgizýde. Jańa pedagogıkalyq ádis-tásildi meńgergen árbir tárbıeshi balanyń jan-jaqty qalyptasýyna erekshe mán beredi. Básekege qabiletti tulǵa qalyptastyrý balabaqshadan bastalatynyn eskerip, aıanyp qalmaýdamyz.
Anar JAQYPOVA,
“Balarman” balabaqshasynyń ádiskeri.