Полицейлер 500 грамға жуық синтетикалық есірткі сатқан облыс орталығының 29 жасар тұрғынын құрықтады. Бұрын есірткі қылмысы үшін сотты болған қала тұрғыны “Telegram” мессенджерінде арнайы парақша ашып, 3,5 мың желі қолданушысын жинаған. Осы онлайн-ресурс арқылы қаланың түрлі шағынаудандарында жасырын түрде синтетикалық есірткі сатумен айналысқан.
Күдікті Петропавл қаласының орталығында ұсталды. Ол отырған таксиді тексеру кезінде бірнеше грамм синтетикалық есірткі табылды. Сонымен қатар пәтерінде 400 грамнан аса спайс сақтаған. Сондай-ақ, оның үйінен синтетикалық есірткі дайындауға арналған концентрат, электронды таразы, бөлшектеп салатын материалдар, ұялы телефон және ноутбук тәркіленді.
– Есірткі сату фактісі бойынша Қылмыстық кодекстің 297-бабымен сотқа дейінгі тергеу жүргізілуде. Ұсталған адам Петропавл қалалық полиция басқармасының уақытша ұстау оқшаулағышына қамауға алынды. Бұрын ол есірткі сақтағаны үшін сотталған, былтырғы жылдың көктемінде бостандыққа шыққан, – деді есірткі қылмысына қарсы іс-қимыл бөлімінің бастығы Рахат Нұрахметов.
Жыл басынан полицейлер есірткі бизнесі саласында 37 қылмыстық істі анықтады. 1 400 грамнан аса түрлі есірткі заттары алынды.
Сурет https://otyrar.kz/ сайтынан алынды.