Jyl saıyn Bilim jáne ǵylym mınıstrliginiń “Daryn” respýblıkalyq ǵylymı-tájirıbelik ortalyǵynyń uıymdastyrýymen ótetin jalpy bilim beretin pánder boıynsha respýblıkalyq ǵylymı jobalar konkýrsynda elimizdiń barlyq óńirleriniń úzdik oqýshylary baq synaıdy. Ábý Dosmuhambetov atyndaǵy daryndy balalarǵa mamandandyrylǵan gımnazıa-ınternat oqýshylary Almaty qalasyndaǵy ál-Farabı atyndaǵy Qazaq Ulttyq ýnıversıtetinde uıymdastyrylǵan osy jolǵy baıqaýdan júldeli oraldy.
Bıyl konkýrs “Ǵylymı-tehnıkalyq progres – ekonomıkalyq ósýdiń negizgi býyny”, “Ekonomıkalyq jáne áleýmettik prosesterdi matematıkalyq modeldeý”, “Taza tabıǵı orta – “Qazaqstan – 2050” strategıasyn iske asyrýdyń negizi”, “Qazaqstannyń tarıhı eskertkishteri jáne bolashaq damýy bar saıahat baǵdarlary” degen tórt baǵyt boıynsha uıymdastyryldy. Oqýshylardyń ǵylymı jobalaryn qorǵaýdyń ashyqtyǵyn qamtamasyz etý maqsatynda barlyq seksıalar onlaın rejimde ótip, Bilim jáne ǵylym mınıstrliginiń jáne “Daryn” ortalyǵynyń áleýmettik jelileri arqyly tamashalaýǵa múmkindik jasaldy.
Konkýrstyń aqtyq kezeńinde elimizdiń túkpir-túkpirinen qatysqan 737 daryndy oqýshy baqtaryn synady. Ábý Dosmuhambetov atyndaǵy oblystyq daryndy balalarǵa mamandandyrylǵan gımnazıaınternat shákirtteri bes jobany qorǵap, qazaq tili jáne bıologıa pánderi boıynsha birinshi jáne úshinshi oryndardy jeńip aldy. 9-synyp oqýshysy Ádıa Erkin qazaq tilinen “Aımaqtyq jer-sý ataýlarynyń antroponımdik erekshelikteri”, 11-synyp oqýshysy Áıgerim Qabdulqalyqova men Ádilhan Bekjanov “Polýchenıe lechebnyh fıtoplenok, soderjashıh bıologıcheskı aktıvnye veshestva rastenı Severo-Kazahstanskoı oblastı” taqyryptarynda ázirlegen jobalaryn sátti qorǵap kelgeni – mektebimiz úshin zor maqtanysh.
Aınagúl ESQALIEVA,
Ábý Dosmuhambetov atyndaǵy daryndy balalarǵa mamandandyrylǵan gımnazıa-ınternat dırektorynyń orynbasary.