Ұлттық банк өкілдері “Қазақстан Республикасында қолма-қол шетел валютасын айырбастау операцияларын ұйымдастыру ережелеріне өзгерістер енгізу туралы” қаулыға түсініктеме берді.
Жаңа ережеге сәйкес қазір айырбастау пунктінің ең төменгі жарғылық капиталы Нұр-Сұлтан қаласында, республикалық маңызы бар қалалар мен облыс орталықтарында орналасқан айырбастау пунктері үшін 100 миллион теңгені құрайды.
– Біріншіден, барлық банктік емес айырбастау пунктері үшін орналасқан жеріне қарамастан, 100 млн. теңге мөлшерінде жарғылық капитал болуы тиіс болатын. Қазір ауылдар мен шағын қалаларда орналасқан нысандар үшін жарғылық капиталдың мөлшері 50 млн. теңгеге дейін азайтылды. Екіншіден, бұл норманы енгізу уақыты ауыстырылды. Бастапқыда талапты 2020 жылдың 1 қаңтарынан бастап енгізу жоспарланған. Түзетулерге сәйкес республикалық маңызы бар қалаларда орналасқан ұйымдар үшін норма 2020 жылдың 1 сәуірінен бастап, ал облыстардың және облыстық маңызы бар қалалардың әкімшілік орталықтарында 2020 жылдың 1 шілдесінен бастап күшіне енеді, – дейді Ұлттық банктің қолма-қол ақша айналымы департаментінің директоры Жомарт Қажымұратов.
Сонымен қатар жаңа ережеге сәйкес айырбастау пункттері 1 ақпаннан бастап 9.00-ден 20.00-ге дейін жұмыс істейді. Ұлттық банктің қолма-қол ақша айналымы департаментінің директоры Жомарт Қажымұратовтың айтуынша, жұмыс кестесі айырбастау пунктері мен олардың клиенттерінің қауіпсіздігіне байланысты өзгеріп отыр. Бұл шара кешкі және түнгі уақытта қолма-қол шетелдік валютаны сатып алуда валюта курсының өсу фактілерін болдырмауға, халық арасында негізсіз дүрлігу болмауына көмектеседі.
Әуежай, темір жол арқылы Қазақстанға келетін/кететін және мемлекеттік шекара арқылы өткізу пунктіндегі адамдар үшін тәулік бойы жұмыс істейді. Ал бірінші санаттағы ірі сауда орталықтарында сағат 9.00-ден 22.00-ге дейін ашық. Сондай-ақ, енді ақша айырбастау пунктері әр операцияны журналға тіркеп отырады. Яғни, ақпаннан бастап ақша айырбастаған адамның аты-жөні мен жеке куәлігінің нөмірі жазылады. “Әр айырбастау операциясынан кейін қызметкерлер журналға адамның жеке куәлігіндегі мәліметтерді (тегі, аты, әкесінің аты), берілген күнін, құжаттың нөмірін, жарамдылық мерзімін жазып алады. Сонымен қатар жаңа талап бойынша айырбастайтын ақшаның көлемі 500 мың теңгеден аспауы керек”, – дейді Жомарт Қажымұратов. Оның айтуынша, бұл – әлемнің көптеген елінде қолданылатын халықаралық тәжірибе.
Алма ҚОСПАНОВА.