Өңірімізге гастрольдік сапармен Алматыдағы «Шам» театры келді. Өнер ұжымы Қызылжарлықтарға «№37» спектаклін ұсынды. Қойылымды тамашалауға қала тұрғындарынан бөлек облыс орталығынан шалғайда жатқан аудандарданда көрермендер келді.
«Шам» театрының құрылғанына төрт жыл толды. Осы уақыт ішінде еліміздің көптеген өңірлеріне барып, театрсүйер қауымның ыстық ықыласына бөленіп үлгерген. «Жергілікті жұртшылықтың Сағызбай Қарабалин, Тынышкүл Сұлтанбердиева, Лиза Серікова сынды өнер майталмандарына қошеметі ерекше болды. «№37» спектаклі 20-шы қарашадан бастап Қазақстанның барлық кинотеатрынан фильм ретінде де көрсетілетін болады», – деді қойылым режиссері Фархат Молдағали.
«№37» спектаклі – бүкіл қоғамның дертті екенін, ол дерттің еш жазылмайтынын, жазуға ешкімнің құлықсыз екенін ашық көрсеткен қойылым. Ананы ауру қылған бала, баланы тыңдауға құлықсыз әке, соқыр қызғанышқа бой алдырып, бауырын бауырына баса алмаған аға, сүйіктісіне қосылып, баласын иіскей алмаған әке. Бір- бірінің жүрек үнін естуден қалған кейіпкерлердің ащы мұңы қоғамдағы қазіргі келеңсіздіктермен үндеседі. Қойылымның басты кейіпкері Расул өзін тыңдағысы келмейтін отбасынан кету туралы шешім қабылдайды. Сүйіктісінен айрылған Зейнеп жігітінің ағасы Әнуарға тұрмысқа шығып, бақытсыз ғұмыр кешеді. «Зейнептің тағдырын қайталаған жандар біздің қоғамда да жоқ емес. Қай ана болмасын өз баласының толыққанды отбасында тәрбиеленгенін қалайды. Зейнеп те сол сияқты ішкіш Әнуарды сүймесе де, баласының әкесіз өспегенін қалап, тұрмысқа шығады», – дейді актриса Зарина Кармен.
Көрерменді бір күлдіріп, бір жылатқан қойылым соңында Н. Погодин атындағы облыстық орыс драма театрының директоры Спартак Рамазанов алматылық меймандарға жүрекжарды лебізін білдірді.
Самрат ҚҰСКЕНОВ,
«Soltüstık Qazaqstan».