Соңғы жылдары облысымызда шағын және орта кәсіпкерліктің даму қарқыны жоғары. Әсіресе, кәсіпкерлік саласында бағын сынап жүрген қыз-келіншектердің қатары қалыңдай түсуде. Атап айтқанда, өңірде 30 мыңнан астам бизнес субъектісі бар болса, оның 13 мыңын нәзік жандар басқарады. Бұдан бөлек, былтыр “Еңбек” нәтижелі жұмыспен қамту және жаппай кәсіпкерлікті дамытудың 2017-2021 жылдарға арналған бағдарламасы аясында 32 кәсіпкердің жобасы қолдау тапса, соның 8-і әйелдердің үлесінде.
Отбасының берекесі мен бірлігін сақтап, сүйікті жар, ардақты ана атанып, әрі заман талабына сай кәсібін дөңгелетіп отырған нәзік жандар аз емес. Ғабит Мүсірепов атындағы ауданның орталығында алғашқылардың бірі болып қоғамдық тамақтану орнын ашып, халықтың ықыласына бөленіп жүрген Раушан Мұстафина да сондай жандардың бірі. “Үздік кәсіпкер – 2017” өңірлік байқауында жеңімпаз атанған Раушан Ахмерқызының есімі аудан тұрғындарына жақсы танымал.
– Икемi бар адамды кәсіпке заманның өзi бейiмдейді. Бәсекелестік ортада көп еңбектеніп, тәжірибе жинақтауыма тура келді. Уақыт өте келе аудан орталығы тұрғындарының қолымнан іс келетiнiне көздері жетті. Бұл бойымдағы іскерлік қабілет пен өзіме деген сенімнің арқасы деп білемін. Соңғы жылдары қыз-келіншектердің қоғам және отбасы алдындағы рөлі жоғарылады. Ел экономикасының өсіп-өркендеуіне де нәзік жандардың қосып отырған үлесі аз емес, – дейді кәсіпкер.
Раушан Мұстафина ауыл мектебін бітіргеннен кейін кәсіптік-техникалық училищеге оқуға түсіп, аспаз мамандығын меңгереді. Төртінші разрядты маман тоқсаныншы жылдары “КСРО-ның 60-жылдығы” атындағы кеңшардың асханасында бас аспаз, Куйбышев ет комбинатында аспаз-кондитер, кейін “Игілік” жеке кәсіпкерлігінде асхана меңгерушісі болған. Яғни, еңбекпен есейген.
Жеке кәсіпкер бүгінде ауылдастарын жұмыспен қамтып қана қоймай, жергілікті тұрғындардың әлеуметтік жағдайына да ерекше көңіл бөлуде. Іскер әйел жарымжандарға, көпбалалы отбасыларға және жалғызбасты қарттарға қолдау көрсетуді игі дәстүрге айналдырған. Аудандық кәсіпкерлер палатасының мүшесі жыл сайын “Мектепке жол” акциясына қатысады. Қарттар күнінде үлкендерге арнап дастарқан жайып, жергілікті коррекциялық мектептің оқушыларына қамқорлық көрсетеді. Былтыр алақаны ашық жанның бұл еңбегі де еленіп, “Жомарт жүрек” байқауының облыстық кезеңінде облыс әкімінің Алғыс хатымен марапатталуы жерлестері үшін зор мақтаныш.
Кәсіпкердің жұмысына жұбайы Елдар Амангелдіұлы мен қызы Роза көмектеседі. Бүгінгі таңда Раушан Мұстафина iскер басшы, сүйікті жар, аяулы ана ғана емес, сондай-ақ, Тимур, Даниил және Әли есімді немере-жиендерін бағып отырған асыл әже. Сондықтан қайда жүрсе де, алдымен отбасының амандығын тілейді. Ауыл кәсіпкері алдағы уақытта тапсырыс бойынша тағам пісіріп, үйді-үйге жеткізіп беру жобасын қолға алуды жоспарлауда. Себебі, күн ұзаққа жұмыста жүретін қыз-келіншектердің үйде бауырсақ, тоқаш және тағы да басқа тәттілерді пісіруге уақыттары бола бермейді. Сондықтан іскер жан бұл бастамасының да сәтті болатынына сенімді.
Қанат АТАМАНОВ,
“Soltústik Qazaqstan.