Өңірде «Ауыл» партиясының 25 жылдығына орай «Студенттік жастар жасағы» жобасы өз жұмысын бастады. Студенттік жасақтар педагогикалық, құрылыс, клининг және механизаторлық бағытта қызмет етпек. Мұндай науқан бүкіл ел көлемінде өтіп жатыр. Биыл жұмыс істеуге ынталы жастардың саны едәуір артқан.
– Бұл жыл елімізде Жұмысшы мамандықтар жылы деп жарияланды. Бұл бастама еңбек адамына құрмет көрсетіп, кәсіби техникалық бағыттағы мамандықтардың маңызын арттыруға, жастарды практикалық кәсіпке баулуға бағытталған маңызды қадам, – деді облыс әкімінің орынбасары Жүсіп Жұмағұлов.
Еңбек жасақтарының қатарын толықтырған жастар шілде айынан бастап, оқу басталғанға дейін жұмыс істейді. Студенттер айына 150 мың теңгеден жоғары табыс таба алады. Бұл бір жағынан жұмысшы мамандықтардың беделін арттыруға септессе, екінші жағынан білім алушылардың жазғы демалысын пайдалы өткізуге мүмкіндік береді.
– Еңбек жасақтарының бірінің бағыты – механизаторлық. Онда тіркелгендер Ғабит Мүсірепов атындағы ауданда жұмыс істемек. Ал құрылыс пен клининг жасақтары қалада жұмыс істейді. Педагогикалық жасақ мектепте қызмет етпек, – дейді партия төрағасының орынбасары Қайрат Айтуғанов.
Шырайлым НҰРҚАНОВА,
М.Қозыбаев атындағы СҚУ-дың студенті.