Алғашқы танысу қадамы «Alegeum Elektrik» кәсіпорнынан басталды. Петропавл электротехникалық зауыты шығаратын трансформаторлық жабдықтар негізінен ТМД елдеріне экспортталады. Келесі нысан – 1928 жылы құрылған С.Киров атындағы зауыт. Мұнда темір жол және мұнай-газ саласына арналған құрал-жабдықтар құрастырылады. Бұдан бөлек, Орта Азияда баламасы жоқ 16 қабатты баспа платалары өндіріледі. Қонақтарға баспа платаларын жинайтын цехтың жұмысы туралы баяндалды. Бүкіл үдеріс автоматтандырылған. Делегация мүшелері өндірісті автоматтандыру және цифрландыру жұмыстарына жоғары баға берді. «Варгашинский атындағы өртке қарсы және арнайы жабдықтар зауыты» АҚ бас директоры Владимир Казаков өнеркәсіп саласы жақсы дамып келе жатқанын, тәжірибе алмасуға дайын екенін жеткізді.
Бұдан кейін облыс әкімі Ғауез Нұрмұхамбетов пен Қорған облысының губернаторы Вадим Шумков Абай мен Пушкин ескерткіштеріне гүл шоғын қою рәсіміне қатысты. Іс-шара барысында ұлы тұлғалардың өлеңдері оқылып, олардың шығармашылығы мен рухани мұрасына құрмет көрсетілді.
Мәртебелі меймандарға «Радуга» серіктестігі өз есігін айқара ашып, шикізатты өңдеуден бастап, дайын өнім шығаруға дейінгі толық цикл егжей-тегжейлі таныстырылды. «Зеленый Север» жылыжайы тұрғындарды қысы-жазы көкөніспен қамтамасыз етеді, артылғанын көрші облыстарға жөнелтеді. Вадим Шумков өндірістің ауқымы мен бірегейлігін жақсы қырынан бағалады.
Меймандар жас балғындар жаттығатын үстел теннисі орталығына барды. Мұндағы спорттық алаңдар халықаралық деңгейдегі жарыстарды өткізуге толық сай келеді.
Бұдан кейін қонақтар «Qyzyljar» креатив орталығына ат басын бұрды. Оларға жас дизайнерлер, суретшілер мен музыканттар еңбектенетін шығармашылық кеңістіктер, шеберханалар мен студиялар таныстырылды. Креативті экономиканы дамыту бағыттары, өңір бойынша жүзеге асырылып жатқан бастамалар баяндалды. Орталықтың концерт залында есту қабілеті шектеулі өнерпаздардан құралған ерекше «Sensitive» би театрының өнерін тамашалады.
Қорғандық делегация Оқушылар сарайы, № 28 мектеп, М.Қозыбаев атындағы Солтүстік Қазақстан университеті сияқты білім беру нысандарын аралап, олардың назарына заманауи биотехнологиялар зертханасы, медицина бағытындағы инновациялық кабинеттер, соңғы үлгідегі құрал-жабдықтар, ақылды роботтар, «Келешек мектептері» жобасы ұсынылды.
Қорған облысы білім және ғылым департаментінің директоры Андрей Кочеров екі өңірдің білім саласындағы ынтымақтастығы бірлескен бағдарламалар бағытында тың мүмкіндіктерге жол ашатынын атап өтті.
Қорған облысы делегациясының өңірге жұмыс сапары облыстық әкімдікте түйінделді. Ғауез Нұрмұхамбетов өз сөзінде шекаралық аймақтағы стратегиялық серіктес саналатын екі тараптың кезекті кездесуі өңір үшін маңызды екеніне тоқталды.
«Тараптар бірін-бірі жақсы біледі, көп жылдан бері етене араласып келеді. Экономиканың негізгі бағыттары бойынша берік әріптестік байланыс орныққан. Алда алар асулар, бағындырар белестер аз емес. Оның ішінде ауыл шаруашылығы мен өнеркәсіп секторының әлеуеті жоғары. Басты міндет – алған қарқыннан таймау, маңызды жобаларды бірлесіп іске асыру», – деді Ғауез Торсанұлы.
Вадим Шумков Солтүстік Қазақстан облысына осымен үшінші рет келіп отырғанын, әр сапарында оң өзгеріс байқайтынын жеткізіп, қонақжайлық ыстық ықыласқа ризашылығын білдірді.
«Петропавл көп жаңарған, әлеуметтік маңызы бар нысандар тұрғызылған. Өңірде заманауи тауарлы-сүт фермаларының көлемі ұлғайған. Мұның бәрі–құптарлық қадам, үйренерлік тәжірибе. Өз басым қазақстандық тауар нарығының мейлінше молайғанын қалаймын»,–деді губернатор.
Облыс әкімінің орынбасары Қанат Дүзелбаевтың және Қорған облысы губернаторының орынбасары Сергей Гавриннің баяндамаларынан аңғарылғандай, тараптар алдыңғы уағдаластықтарды қорытындылап, өзара іс-қимылды кеңейту жөніндегі жоспарларды белгіледі. Кездесуде сауда шектеулерін жоюға, аграрлық саладағы бірлескен жобаларды игеруге, инвестиция және өнім жеткізуге, саудадан бастап туристер алмасуға дейінгі мәселелерге басымдық берілді. Аграрлық секторға ерекше назар аударылды. Облыста себілетін элиталы тұқымның шамамен үштен бірі Қорған облысынан әкелінеді. Қорғандықтар қазақстандық пациенттерді медициналық мекемелерге, оның ішінде Елизаров атындағы орталыққа ем алуға шақырды.
Вадим Шумков делегацияның Петропавлға келуі өңірлер арасындағы берік, тату көршілік қарым-қатынастың нақты дәлелі болғанын атап өтті.
«Облыс әкіміне айрықша алғыс айтқым келеді. Қазақ халқында «жақсы көрші алыс туыстан жақсы» деген тамаша сөз бар», – дей келіп, инфрақұрылым мен әлеуметтік жобалар өрелі өзгерістерге арқау болатынын алға тартты, өз нарықтарында сапалы және пайдалы қазақстандық өнімдерді молайтуға келіскендерін атап өтті.
«Мен қостараптық байланыстың жоғары деңгейін және жергілікті бастамалардың әлеуметтік маңызын атап өткім келеді. Қорған облысы өңіріміз бен бүкіл еліміз үшін серпінді стратегиялық серіктес болып қала береді. Арамыздағы ынтымақтастықтың тарихы әріден басталады және тұрақты оң динамикаға ие. Өзара сауда көлемі өсуде. Өнеркәсіптен туризмге дейінгі бағыттардың ауқымы кеңеюде. Біз жоғары әлеуетті көріп отырмыз және барлық деңгейдегі байланыстарды одан әрі дамытуға дайынбыз», – деді Ғауез Нұрмұхамбетов
Қос тарап машина жасау, ғылым және ауыл шаруашылығы сияқты салалардағы өзара іс-қимылды тереңдетуге дайын екендіктерін білдірді.
Өмір ЕСҚАЛИ,
«Soltüstık Qazaqstan».