Өңір басшысы Құмар Ақсақалов жергілікті телеарналар арқылы облыс тұрғындарымен тікелей сұхбат жүргізіп, адамзатқа үлкен қауіп төндіріп отырған коронавирусқа қатысты ахуал мен жүргізіліп жатқан алдын алу шаралары туралы баяндады.
– Елімізде коронавирус жұқтырғандардың анықталуы солтүстікқазақстандықтарды да қатты алаңдатып отыр. Осыған орай көптеген сауалдардың туындайтыны заңды. Баса айтарым, халықтың денсаулығы мен өмірін сақтау, жақсарту бағытында қабылданып жатқан кешенді шараларға түсіністікпен қарау керек, – деген Құмар Іргебайұлы 16 наурызда Мемлекет басшысы Қасым-Жомарт Тоқаев республика жұртшылығына Үндеу арнап, бір айға төтенше жағдай жарияланғанын, бүгінде Нұр-Сұлтан мен Алматы қалалары карантинге жабылғанын, облыста ахуал қалыпты, күнделікті бақылауға алынғанын, жұқпалы кеселдің алдын алу, болдырмау шаралары кешенді түрде атқарылып жатқанын атап өтті.
Адамдар көп шоғырланатын қоғамдық-көпшілік орындарда, мәдениет, білім беру мекемелерінде санитарлық және дезинфекциялық жұмыстар ерекше жанданды. Айрықша маңызды және тіршілікті қамтамасыз ететін нысандар қорғауға алынды. Сондай-ақ, тұрғындардың қауіпсіздігін қамтамасыз ету мақсатымен көшелерді бақылау күшейтілді.
Облыс әкімі Үкімет пен жергілікті билік орындары тарапынан қауіпті вирустың таралуын болдырмау және аймақта әлеуметтік-экономикалық тұрақтылықты сақтауға байланысты қабылданып жатқан шараларға тоқталды. Облыста коронавирус жұқтыру фактісі тіркелген жоқ. Бірақ солай екен деп самарқаулыққа, жайбарақаттыққа салынуға болмайды. Жағдай бүкіл қызмет орындары тарапынан қатаң бақылауда болуы тиіс. Барлығы 161 адам карантинге алынып, 96-сы үйлеріне аман-сау оралды.
Облыс әкімі тұрғындар үшін өткір мәселенің бірі ретінде жеке қорғаныш құралдары тапшылығын атады. Бұл – Қазақстан ғана емес, әлем үшін өте өзекті. Қазір осы шетін мәселені жедел шешу үшін кәсіпорындар бетперде шығаруға бағдарланып отыр. Ал тұрмыстық химия фабрикасында вирустарды тез жоятын арнайы сабын шығарылады.
Құмар Ақсақалов өз сөзінде Нұр-Сұлтан мен Алматы қалаларында карантин жариялануы адамдардың денсаулығы үшін жасалып отырған өте маңызды қадам екенін атап көрсетіп, солтүстікқазақстандықтарды басқа аймақтарға, облыс, аудандар ішінде жолсапарға шығудан бас тартуға шақырды. Супермаркеттер, азық-түлік дүкендері мен сауда-саттық алаңдары қалыпты жұмыс істеп тұр. Өңірде азық-түлік қоры жеткілікті. Күнделікті тұтынатын тауарлар бағасын себепсіз қымбаттатуға жол берілмейді. Былайша айтқанда, дүрлігуге негіз жоқ.
Құмар Іргебайұлы тұрғындарды көпшілік жиналатын отбасылық жиын-тойлар мен кез келген мерекелік іс-шараларды өткізуден бас тартуға, яғни азаматтық жауапкершілік танытуға шақырды. Қауіпті вирустан қорғанудың барлық қарапайым талаптарын сақтау арқылы ғана оның таралуына тосқауыл қоюға болады. Жұртшылықтың көп жүретін, жиналатын орындары, атап айтқанда, қоғамдық көліктерде, халыққа қызмет көрсету орталықтарында санитарлық-профилактикалық және эпидемияға қарсы жұмыстарды жоспарлы түрде атқару өте маңызды. Халыққа қызмет көрсету орталықтары электронды қызмет көрсету жүйесіне ауыстырылды. Кез келген қызмет түрін үйден шықпай-ақ интернет арқылы алуға мүмкіндік бар. Осы орайда қарттар мен балалардың қауіпсіздігіне барынша назар аудару қажет. Мектеп оқушылары демалысқа жіберіліп, мұғалімдер қашықтан білім беру жүйесіне көшірілді. Барлық қосымша білім беру орталықтары мен спорт секциялары өз жұмыстарын уақытша тоқтатты. Соған қарамастан оқытушылар мен жаттықтырушылардың айлық жалақысы сақталады. Ал балабақшалар өз жұмыстарын жалғастыруда. Колледждер мен университет те онлайн оқыту жүйесіне көшті. Бұған техникалық мүмкіндіктер бар.
Облыс әкімі сөзінің аяғында коронавирустың жаһандық экономикаға кері әсер ету себептеріне тоқтала келіп, соған қарамастан шағын және орта бизнестің дамуына барынша жағдай жасалатынын, әлеуметтік шиеленіске, жұмыссыздыққа жол бермеудің барлық жолдары қарастырылатынын, ол үшін елімізде қаржылық та, ұйымдастырушылық та, моральдық та әлеует жеткілікті екенін айтты.
Өмір ЕСҚАЛИ,
“Soltústik Qazaqstan”.