Бағзы заманнан ерлермен қатар қыздар да ел мен жер қорғауда аянып қалмады. Сұрапыл соғыс жылдары аруларымыз батырлығымен көзге түссе, бейбіт күнде спорттық алаңдарда барын салып, Қазақстан туын көкте желбіретіп жүр. Бокста теріскейлік ару Наталья Богданова ешкімге дес бермесе, бозкілемде тағы бір жарық жұлдыз пайда болды. Оның есімі Анна Стратан.
Анна Мамлют ауданына қарасты Меңгесер ауылында дүниеге келген. Ауылдың саф ауасымен тыныстап, қасиетті тұзды көлінде шомылып өскен бұрымдының спорттағы жетістіктері көңіл қуантады.
– Мамлют ауданында спорт жақсы жолға қойылған. Облыстық және республикалық жарыстарда гір көтеруден, волейболдан өңір командасы сапында жүрген жерлестеріміз бар. Өкініштісі сол, әлемдік аренада бұған дейін бірде-бір спортшы төбе көрсетпепті. Қазір Аннамыз ел намысын қорғап, байрақты бәсекелерден олжалы оралып жүр. Оның жеңіске жетуіне табиғатпен берілген төзімділігі мен қайсар мінезі себеп, – дейді жеке бапкері Руслан Дәулетов.
Бұрымды балуанымыз кішкентайынан спортқа жақын. Анна алғашында командалық спорт түрлеріне қызығушылық танытқан. Тіпті аудан атынан түрлі облыстық жарыстарға қатысқан.
– Алдымен баскетболмен айналыстым, кейін футболға бүйрегім бұрды. Ақырындап жеке спорт түрлеріне қызығушылық таныта бастадым. Жеңіл атлетикамен де айналыстым. Ара-тұра күрес үйірмесіне де барып жүрдім. Әр спорттан өзіме пайдалы жағын сіңіргім келді. Осылайша бозкілемнен бірақ шықтым, – дейді ол.
Қазір Анна Стратанның жасы 18-де. Ол бірнеше республикалық және халықаралық жарысқа қатысып, жүлдегер атанғаны баршаға мәлім. Бапкері Руслан Дәулетов алғашқы халықаралық жарысы туралы былай дейді:
– Ол алғашқы халықаралық жарысты Түмен облысындағы
Голышманово қаласында өткізді. Бұл турнирде жеңіліп жатып, соңғы сәттерде жеңісті жұлып алды. Бозкілемдегі және қарапайым өмірдегі Анна екі бөлек адам. Спортта ол батыл, өр мінезді. Ал достарының арасында жұмсақ, өте мейірімді. Әрқашан жақындары үшін жаны ашып жүреді.
Өткен жылы жерлесіміз 17 жасқа дейінгі қыздар арасында Иорданияның Амман қаласында өткен әлем чемпионатында қола жүлде жеңіп алған болатын. Биыл бұрымды балуан жастар арасындағы дүниежүзілік біріншілікте жүлдегер атанды. Осы жолғы жарыс Болгарияда өтті.
– Жарыс 20 жасқа дейінгі балуандар арасында өтті. Барлық қыздар мықты, әрқайсысы ересектер құрамасы сапына өткісі келеді. Сондықтан жеңіске деген ұмтылыстары бірден сезілді. Мен 57 келіге дейін салмақта аянып қалмауға тырыстым, – деп әлем чемпионатындағы белдесулері туралы айтқан Анна жартылай финалға дейін қарсыластарын қоғадай жапырғанын жеткізді. Тек ақтық сынға жолдама берілетін белдесуде норвегиялық спортшыға есе жіберіп алған. Бұл жеңіліске мойымаған ол «кіші финал» деп аталатын қола медаль үшін таласта Қазақстан құрамасына үшінші орын әкелді. «Барлық спортшының арманы – Олимпиада ойындары. Менің де бұл белеске жеткім келеді. Ол үшін алдымен ересектер құрамасы сапына өту керек. Онда бәсекелестік жоғары. Бәрі алда, ең бастысы әр жарысқа тыңғылықты дайындалу», – дейді Анна Стратан. Бұрымды балуанның алар асуы әлі алда екеніне сенейік!